Қазақстанда 7-сыныпқа дейін телефон пайдалануға болмайды

<p><strong>Еліміздегі мектептерде смартфон қолданудың жаңа ережелері әзірленіп жатыр. Соған сәйкес бастауыш және орта буын оқушылары сабақ басталар алдында ұялы телефондарын арнайы орынға тапсыруға міндеттелуі мүмкін, деп хабарлайды <a href="/" target="_blank" rel="noopener noreferrer">Egemen.kz</a>.</strong></p>

Оқу-ағарту министрі Жұлдыз Сүлейменова мектептерде смартфон пайдалануға қойылатын шектеулердің қалай жүзеге асырылуы мүмкін екенін айтты. Оның сөзінше, министрлік осы мәселеге қатысты арнайы ереже әзірлеп жатыр. Ал жоғары сынып оқушыларына қатысты смартфон қолдану тәртібі әлі нақты бекітілген жоқ.

Министрдің айтуынша, бұл оқушылары үшін шектеулер жеңілдеу болуы мүмкін. Себебі олардың бірқатар пәндері онлайн-платформалар арқылы оқытылады, сондай-ақ олар ҰБТ мен SAT емтихандарына дайындалады.

«Телефондарға қатысты қазір арнайы ереже әзірлеп жатырмыз. Менің ойымша, жоғары сыныптарда смартфон қажет болады, өйткені көптеген пәндер онлайн-платформалар арқылы өтеді. Сонымен қатар оқушылар ҰБТ мен SAT-қа дайындалады. Бұл мәселелерді әлі де мұғалімдермен талқылаймыз. Ал басқа жағдайларда 7-сыныпқа дейінгі оқушылар сабақ кезінде смартфондарын тапсыруы керек», деді Жұлдыз Сүлейменова.

Бұған дейін министр БЖБ мен ТЖБ мәселесіне қатысты жауап берді.