Үшінші тең ойын және тарихи нәтиже: Кабо-Верде плей-оффқа жолдама алды
<p>Әлем чемпионатының топтық кезеңінде Кабо-Верде мен Сауд Арабиясы құрамалары кездесті. АҚШ-тың Хьюстон қаласында өткен матч 0:0 есебімен аяқталды, деп хабарлайды <a href="/" target="_blank" rel="noopener noreferrer">Egemen.kz</a></p>
Н тобының аутсайдерлері саналған екі құрама да плей-оффқа шығу мүмкіндігін сақтап қалған болатын.
Кездесудің төртінші минутында Жуан Пальинья қарсылас қорғаушысы Абдулхамидті ескерту алуға мәжбүрледі. Мендеш пен Пина ұйымдастырған шабуылдар Сауд Арабиясының сол қапталына жиі қауіп төндірді.
Алғашқы қауіпті сәтті Семеду жасады. Ол сол қапталдан ортаға ойысып, шамамен 12 метрден соққы жасағанымен, қақпашы Аль-Овайс допты бұрышқа қайтарды.
Матч қарқыны жоғары болмағанымен, қос команда арасындағы тартысты күрес жиі болып, жарақат алуға да себеп болды. Соның салдарынан Сауд Арабиясының қорғаушысы Аль-Тамбакти бірінші таймның өзінде алаңнан кетуге мәжбүр болды.
Екінші тайм басталысымен Кабо-Верде футболшылары шабуыл қарқынын күшейтті. Алғашында Райан Мендештің пасынан кейін Монтейру қақпаға соққы жасағанымен, Аль-Овайс допты оңай қайтарды. Кейін Мендеш қарсыласын алдап өтіп, допты Кевин Лениниге шығарды, алайда оның алыстан тепкен добы қақпа маңдайшасынан тыс кетті.
Матчтың аяқталуына шамамен 15 минут қалғанда Кабо-Верде тағы бір жақсы мүмкіндікке ие болды. Алайда Дуарте айып алаңының ортасынан дәл қақпашының қолына бағыттап, есеп аша алмады.
Кездесудің соңғы минуттарында Кабо-Верде футболшылары әдейі есепті сақтауға күш салды. Олар параллель өтіп жатқан ойында Испанияның Уругвайды жеңіп жатқанын біліп отырды. Сондықтан нөлдік тең нәтиже олардың плей-оффқа шығуына жеткілікті еді.
Нәтижесінде Кабо-Верде топтық кезеңдегі үшінші ойынын қатарынан тең аяқтады. Ал Испанияның жеңісінің арқасында команда Н тобында екінші орын алып, өз тарихында алғаш рет әлем чемпионатының плей-офф кезеңіне жолдама алды.