Допинг қолданғандар жазаланды
<p style="text-align: left;">Еліміздің тағы бір топ спортшыларының допинг қолдан­ғаны анықталып, олар түрлі мерзімге үлкен спорттан шеттетілді. Бұл ақпарат республикалық допингке қарсы орталығының ресми сайтында жарияланды.</p>
Жазаға ұшырағандар арасында ауыр атлеттер Анастасия Антропова, Вячеслав Корщиков, Тұңғат Жуат, әйелдер күресі өкілдері Мадхия Усманова, Диана Асылбекова, еркін күрес шеберлері Мирас Сұлтанбек, Әлибек Әбдіқасымов, пара-пауэрлифтингшілер Әйгерім Айдарқызы, Камиль Хузиахметов, спорттық гимнастшы Арина Лебедева, дзюдошы Ержан Еренғайыпов, таеквондошы Хальзальпер Ромашкин, джитсер Айкүміс Әбжанова, грек-рим күресі шебері Ерзат Ерланов бар.
Есімдері аталған спортшылардың дені – халықаралық жарыстарда жүлде алып жүргендер. Әсіресе М.Усманованың келешегі алаңдатады. Мадхия былтыр шілде айының соңғы күні Афинадағы жасөспірімдердің әлем біріншілігінде алтыннан алқа таққан еді. Егер әйелдер күресінен елімізде санаулы ғана әлем чемпионы барын ескерсек, бұл медальдың қаншалықты маңызды екені айтпаса да түсінікті. Күні кеше республикалық допингке қарсы орталығының сайтында М.Усманованың 2025 жылдың 13 қазанынан 2029 жылдың 12 қазанына дейін үлкен спорттан шеттетілген жайында ақпарат жарияланды. Олай болса, Біріккен күрес әлемі (United World Wrestling) ұйымы балуанымызды әлем чемпионы атағынан айыруға тиіс.