2-5 пайыздық ипотеканы қалай алу керек?
<p><strong>«Отбасы банк» жылдық 2 және 5 пайыздық мөлшерлемемен берілетін жеңілдетілген тұрғын үй несиесіне өтінім қабылдау басталғанын хабарлады. Бағдарлама бойынша шілде айында бірқатар қалаларда дайын пәтерлер үлестіріледі, деп хабарлайды <a href="/" target="_blank" rel="noopener noreferrer">Egemen.kz</a>.</strong></p>
Бағдарлама аясында несие 20 жылға дейін беріледі. Алғашқы жарна тұрғын үй құнының кемінде 10 пайызын құрайды.
2 пайыздық ипотеканы көпбалалы отбасылар, жетім балалар, I және II топтағы мүгедектігі бар азаматтар, сондай-ақ мүгедектігі бар бала тәрбиелеп отырған отбасылар, жесірлер, Ұлы Отан соғысының және жауынгерлік іс-қимылдардың ардагерлері рәсімдей алады.
5 пайыздық ипотека әлеуметтік осал санатқа жататын өзге де кезекте тұрған азаматтарға, оның ішінде толық емес отбасыларға, қандастарға және басқа да жеңілдік санаттарына ұсынылады.
Бағдарламаға қатысу үшін үміткер тұрғын үй кезегінде тұруы және әлеуметтік осал топтардың біріне жатуы тиіс. Сондай-ақ «Отбасы банктегі» депозитінде несие сомасының кемінде 10 пайызы болуы қажет.
Шілде айында Ақсайда – 114, Шымкентте – 94, Таразда – 15, Оралда – 21, Ақтөбеде – 7, ал Екібастұзда 23 пәтер үлестіріледі. Барлық тұрғын үйлер пайдалануға берілген және таза әрлеумен ұсынылады.
Қазақстанда баспана алуға мүмкіндік беретін зейнетақы реформасы талқыланып жатыр
Пәтерлерді бөлу бірнеше кезеңнен тұрады. Алдымен әкімдік дайын тұрғын үйлерді ұсынады, кейін банк өтінім қабылдайды. Бұдан соң қатысушылардың төлем қабілеті тексеріліп, олар пәтер таңдалады. Осыдан соң тұрғын үйлер үлестіріледі.
Банк мәліметінше, әр тұрғын үй нысанындағы пәтерлердің 70 пайызы ең алдымен әлеуметтік тұрғыдан ең осал азаматтарға беріледі. Оның 20 пайызы жетім балаларға арналған. Қалған 30 пайызы өзге әлеуметтік осал санаттағы кезекте тұрған азаматтар арасында бөлінеді.
Еске сала кетейік, елімізде ипотекалық несиелер бойынша жылдық тиімді сыйақы мөлшерлемесінің шекті деңгейін есептеу тәртібі өзгерді. Енді ипотека мөлшерлемесі бастапқы жарнаның көлеміне байланысты белгіленеді.