Қазақстан шұғыл медициналық көмек көрсету тәжірибесін таныстырды

<p class="PDq2pG_selectionAnchorContainer" data-start="805" data-end="1034">Денсаулық сақтау министрі Ақмарал Әлназарова Ыстанбұлда өткен Дүниежүзілік денсаулық сақтау ұйымының (ДДСҰ) конференциясында Қазақстанның медицина және жер сілкінісі кезіндегі шұғыл әрекет ету жүйесінің мүмкіндіктерін таныстырды. Министрдің айтуынша, ел аумағының шамамен 40 пайызы сейсмикалық қауіпті аймақта орналасқан. Осыған байланысты елде төтенше жағдайлар кезінде медициналық көмек көрсету жүйесін жетілдіруге ерекше көңіл бөлініп келеді, деп хабарлайды <a href="/" target="_blank" rel="noopener noreferrer">Egemen.kz</a>.</p>

Бүгінде Ұлттық шұғыл медицина үйлестіру орталығы көпбейінді аурухананы, санитарлық авиация қызметін және еліміздегі 20 өңірлік жедел жәрдем станциясының жұмысын үйлестіреді. Сонымен қатар республикалық маңызы бар автожолдардың қауіпті учаскелерінде орналасқан 41 трассалық медициналық-құтқару пункті жұмыс істейді.

Ақмарал Әлназарова Алматы мен Өскеменде орналасқан Апаттар медицинасы орталығының арнайы жасақтары мен санитариялық-эпидемиологиялық қауіпсіздікті нығайту бағытында атқарылып жатқан жұмыстарға да тоқталды.

Конференция аясында қазақстандық делегация Түркияның Денсаулық сақтау министрлігі және ДДСҰ-ның Еуропалық өңірлік бюросымен екіжақты кездесулер өткізді. Келіссөз нәтижесінде тараптар шұғыл медицина мамандарын бірлесіп даярлау, апаттар медицинасы қызметін дамыту және заманауи технологиялармен алмасу жөнінде уағдаласты.

Министрдің сөзінше, ірі жер сілкіністері мен өзге де төтенше жағдайлардың салдарын тиімді еңсеру үшін мемлекеттер тәжірибе, технология және кәсіби біліммен бөлісуі қажет. Қазақстан бұл бағыттағы халықаралық ынтымақтастықты одан әрі дамытуға дайын екенін мәлімдеді.

Айта кетейік, кеше түнде Тараз тұрғындары жер сілкінісін сезінді. Жер асты дүмпуі 2 балл шамасында болғанын хабарлаған едік.