Бірінші сыныпқа қабылдау: ата-аналар нені білуі керек?

Қазақстанда мемлекеттік мектептердің бірінші сыныбына құжат қабылдау науқаны жалғасып жатыр. Оқу-ағарту министрлігі ата-аналарға өтінішті 31 тамызға дейін тапсыру қажет екенін еске салды.Құжаттарды OQU ұлттық білім беру платформасы, eGov порталы арқылы немесе мектепке тікелей барып тапсыруға болады, деп хабарлайды <a href="/" target="_blank" rel="noopener noreferrer">Egemen.kz</a>.

Министрліктің мәліметінше, «Келешек мектептері» жобасы аясындағы білім беру ұйымдарына алдымен сол мектеп бекітілген аумақта тұратын балалар қабылданады. Бос орын болған жағдайда ата-аналар өзге мемлекеттік мектепті де таңдай алады.

Өтініш беру үшін баланың заңды өкілінің тұрғылықты жері бойынша тұрақты тіркеуі болуы тиіс. Бұл мәлімет мемлекеттік ақпараттық жүйелер арқылы тексеріледі.

Бірінші сыныпқа қабылдау үшін мынадай құжаттар қажет:

баланың 3×4 көлеміндегі фотосуреті;
профилактикалық екпелер картасы (№065/у нысаны);
баланың денсаулық паспорты (№052-2/у нысаны);
ерекше білім беру қажеттілігі бар балалар үшін психологиялық-медициналық-педагогикалық консультацияның қорытындысы.

Мектепалды даярлықтан (нөлінші сыныптан) өткен балалар бірінші сыныпқа ата-анасының немесе заңды өкілінің өтініші негізінде қабылданады.

Оқу-ағарту министрлігі ата-аналарды құжат тапсыруды соңғы күндерге қалдырмауға шақырды.

Айта кетейік, биыл бірінші сыныпқа қабылдау мерзімі өзгерді. Бұрын құжат қабылдау 1 сәуірде басталса, енді өңірлерде ол 27 мамыр мен 29 маусым аралығында кезең-кезеңімен басталып, 31 тамызда аяқталады. Министрлік бұл өзгеріс оқу жылының аяқталу кезеңінде мектептерге түсетін жүктемені азайтуға мүмкіндік беретінін атап өтті.