Калифорнияда 650 гектар жер өртеніп, тұрғындар қауіпсіз аймаққа көшірілді
<p>АҚШ-тың Калифорния штатындағы Лос-Анджелес округінде тұтанған «Саммит» орман өрті бір тәулік ішінде 650 гектарға жуық аумақты шарпыды. Өрттің өршуіне байланысты бірнеше аудан тұрғындарын шұғыл эвакуациялау басталды, деп хабарлайды <a href="/" target="_blank" rel="noopener noreferrer">Egemen.kz</a>.</p>
ТАСС агенттігінің хабарлауынша, өрт 10 шілдеде тұтанған. Калифорнияның өртке қарсы қызметі әзірге тілсіз жаудың шығу себебі анықталмағанын мәлімдеді.
Өрттің қауіпті қарқынмен таралуына байланысты жергілікті билік бірнеше аудан тұрғындарын міндетті түрде эвакуациялау туралы шешім қабылдады. Қазіргі уақытта зардап шеккендер мен қаза тапқандар туралы ресми ақпарат жарияланған жоқ.
Ал Fox News телеарнасының жергілікті бөлімшесі куәгерлерге сілтеме жасап, жалынның кейбір тұрғын үйлер мен басқа да ғимараттарға жеткенін хабарлады.
Айта кетейік, жылдың басында Чилидегі орман өртінен 300 үй қирап, 18 адам қаза тапқаны хабарланған еді.