Ғалымның аты мен хаты

Семейдегі Абайдың әдеби-мемориалдық музейінде филология ғылымдарының докторы, профессор, «Қазақ КСР халық ағарту ісінің үздігі», «Қазақстан Республикасының білім беру ісінің құрметті қызметкері» белгілерінің иегері, Қазақстанның еңбек сіңірген қайраткері Арап Еспенбетовтің «Алтай-Ертіс кітапханасы» сериясымен шыққан екі томдық шығармалар жинағының тұсаукесер кеші өтті. Арап Еспенбетов әдебиеттану саласында елу жылға жуық ең­бек етіп, 200-ден аса ғылыми мақалалар мен кітаптарды жа­рыққа шығарды. 1975 жылы «С.То­райғыровтың лирикасы» деген тақырыпта кандидаттық, 1993 жылы «С.Торайғыровтың шығармашылық өмірбаяны» деген тақырыпта докторлық диссертация қорғады. Сондай-ақ, Семейдегі Қазақ инновациялық гуманитарлық-заң университетінде ғалымға арналып «Ұстаз мерейі» атты жиын өтті. Кездесу аясында көрме ұйым­дастырылып, көпшілік назарына ғалымның алаштану саласына, Шәкәрім мен С.Торайғыровқа арналған ғылыми еңбектері мен көркем шығармалары кеңінен таныстырылды. Арап Сләмұлы – «Абайдың ақындық мектебін» жаңа деңгейге көтерген ғалым, өз ортасында ғылыми мектеп – «Еспенбетов мектебін» қалыптастыра білген айтулы ұстаз. – Бүгінгі жиналып отырған қауымның барлығы сіздің шәкірт­теріңіз. Арап Сләмұлы, сіз ғалым, басшы ретінде бақытты жансыз. Алуан-алуан жасты ғылым деген аламан бәйгеге қостыңыз. Тала­бын ұштадыңыз. Бүгін осы залға әр жылдарда сіздің дәрісіңізді тыңдап білім алған, қазірде қазақ тілі мен әдебиетінің білікті маманы атанған ұстаздар жиналып отыр, – деген Қазақ инновациялық гуманитарлық-заң университетінің ректоры Шырын Құрманбаева оқу орнының дамуына қосқан зор үлесі үшін ғалымға ҚИГЗУ-дің «Құрметті профессоры» атағын беріп, көпшілік қауым атынан ерекше ілтипат көрсетті. Бұдан кейін тілектер легі бей­нетаспа арқылы жеткізілді. Алғашқылардың бірі болып ғалым­ның шәкірті, Л.Н.Гумилев атындағы Еуразия ұлттық университетінің ректоры Ерлан Сыдықов сөз алды. Мерейтой иесін саяси ғылымдар докторы, Л.Н.Гумилев атындағы Еуразия ұлттық университетінің профессоры Нәубет Қалиев те құттықтады. Айта кету керек, А.Еспенбетовтің «Алтай-Ертіс» кітапханасы бойынша жарық көрген екі томдық шығармалар жинағы – өзекті әрі маңызды тақырыптарды арқау еткен, музей деректерін байыппен талдауға арналған әдебиеттанудағы тамаша еңбек. Раушан НҰҒМАНБЕКОВА. СЕМЕЙ.