Үмітті үкілеген «Ұлытау үні»

Фестивальдың ашылу сал­та­натында Мем­ле­кеттік сый­лықтың лауреаты Кенжеғали Мыржықбай, «Да­рын» мемлекеттік жастар сый­лы­ғының лауреаты Асқар Мұ­қият, Қазақ­станның еңбек сіңірген әртісі Бе­реке Көшенов, «Жошы» этно-фольклорлық ансамблі өнер көрсетті.

Фестивальда қазақтың төл мәдениеті мен ұлттық өнерін насихаттаған төрт ірі байқау – Шәмші Қалдаяқовтың 95 жыл­дығына арналған әншілер бай­қауы, Кетбұқа жыраудың 840 жылдығына арналған күйшілер байқауы, Нұрғиса Тілендиевтің 100 жылдығына арналған мультиаспапшылар байқауы және ақын­дар айтысы өтті.

Кетбұқа бабамыздың туға­нына – биыл 840 жыл. Осы айтулы оқиғаға орай фестиваль ая­сында күйшілер са­йысы өтті. Дом­бырашылар еліміздің тоғыз өңірінен қатысты. Күй сайысының бірінші, екінші кезеңінде әрбір қатысушы үш шығармадан орындады.

Байқаудың қазылар алқа­сының төрағасы Қазақстанның еңбек сіңірген қайраткері, күйші Жанғали Жүзбай болды. Қазылар алқасының шешімімен бас жүл­дені Айшолпан Қасымова (Ас­тана қаласы) олжалады. І орынды Ернар Сәтім (Түркістан облысы), ІІ орынды Сырым Шомбаев (Жамбыл облысы), ІІІ орынды Ал­тынай Махмут (Қарағанды облы­сы), Нұриден Оспанов (Ұлытау облысы) иеленді.

Кеңгір суқоймасы жағалауын­дағы Амфитеатр сахнасында Шәм­ші Қал­даяқовтың туғанына 95 жылдығына ар­налған вокалдық байқауға он бір облыстан 14 әнші қатысты. Әр әнші екі ән орындады. Фарида Сауытханның дом­бырамен орындаған «Тамды аруы», Бэджа Калмыковтың «Бақыт құшағында» әндері көрермен көңілінен шықты. Кенжеғали Мыржықбай бастаған қа­зылар алқасының мүшелері әр әншінің өнеріне ден қойып тыңдап, әділ бағасын берді. Бас жүлде Қарағанды облысынан келген Фарида Сауытханға бұйырды. I орынды Ұлытау облысынан Әділет Әбілбай, II орынды Ақмола облысынан Ермек Қасым, III орынды Ақтөбе облысынан Бэджа Калмыков пен Жамбыл облысынан келген Қымбат Жамбылбек иеленді.

Жезқазған қаласындағы Бала­лар өнер мектебінде аңыз­ға айналған тұлға Нұрғиса Тілен­диевтің 100 жылдығына ар­нал­ған «Мультиаспапшылар» респуб­ликалық байқауы өтті. Оған еліміздің сегіз облысынан 11 дарынды жас қатысты. Қа­тысушылар байқаудың бірінші және екінші кезеңінде екі шығармадан орындады.

Этномузыкант Еділ Құсайы­нов төраға болған қазылар алқа­сының шешімі бойынша бас жүлдені Санд­жай Әлмішев (Ұлытау облысы) қан­жығасына байлады. І орынды Айжан Құрақ (Астана қаласы), ІІ орынды Ма­дина Османова (Астана қаласы), ІІІ орын­ды Назира Омар (Павлодар облысы), ІІІ орынды Айхат Қазихан (Ақмола облысы) иеленді. Біраз дарынды жастар дипломант атанды.

«Ұлт ұясы – Ұлытау» атты ақын­дар айтысын тамашалауға келген халық С.Қожамқұлов атындағы Қазақ музыка-драма театрының залына лық толды.

Ұлытау өңірінің халқы Қа­зақ­стан айтыс ақындары мен жыршы-терме­шілердің халық­аралық одағының басқар­ма төрағасы Жүрсін Ерман бастаған ақындарды қошеметтеп қарсы алды.

Жүргізуші аламан айтысқа ат арытып келген Тілеубек Жанарыс (Қарағанды), Батыржан Кәдірбай (Атырау), Дархан Әбдіманатұлы (Тараз қаласы), Ұларбек Минат­хан (Жетісу), Нұрмахан Жақып­бек (Түркістан), Нұрлан Есен­құл (Шымкент қаласы), Сырым Нығызбай (Ұлытау), Рүстем Қайыр­тай (Абай), Фариза Жетпіс­бай (Астана), Нұрмат Мансұров (Қызылорда), Мейірбек Сұл­танхан (Астана), Жібек Шахмар­данқызы (Арқалық) сынды ақындарды сахна төріне шақырып, таныс­тырды.

Ұлытау облысының әкімі Дастан Рыспеков құттықтау сөз айтып, қазылар алқасының төрағасы Жүрсін Ерманның иығына Ұлытау жұртшылығы атынан шапан жапты. Айтысты ғалым-филолог, суырыпсалма ақын Аманжол Әлтаев жүргізді.

Осы жолы ақындардың қата­ры жас­тармен толығыпты. Айтыс­тағы бір ерекшелік ақындарға осы өңірге қатысы бар «Ұлытау және Жошы ұлысы», «Ұлытаудың ұлары – Жақсыгелді», «Шынболат пен Дүйсенбай – айтыстың қос қанаты», «Төрлет еңбек адамы», «Қаныш – қазақ ғылымының атасы», «Кәкімбек – жез дала­ның жезкиігі» деп аталған арнайы тақырыптар берілді. Ақын­дардың кейбіреуі берілген тақы­рыпты терең қозғады. Енді бірі Ұлытау облысындағы жол, экология, денсаулық сияқты шетін мәселелерді тілге тиек етті. Ақындардың арасында түрлі салада қызмет істейтіндер бар. Астаналық Мейірхан Сұлтан­ханмен айтысқан Қытай Халық Республикасынан атамекенге көшіп келген жетісулық Ұларбек Минатханның асау өзендей тасыған өлең ұйқас­тарынан туған топыраққа деген шексіз сүйіспеншілікті сезіндік. Ақындар ұрымтал сөзге ұтқыр жауап беріп, жұртшылықты риза қылды.

Бас жүлдені Рүстем Қайыртай (Абай облысы) жеңіп алды. I орын­ды Нұрлан Есенқұлов (Шым­­кент қаласы), II орынды Сы­рым Нығызбай (Ұлытау облы­сы), III орынды Нұрмат Мансұ­ров (Қызылорда облысы) қанжы­ғасына байлады.

Айтыста қазылар алқасының мүшесі болған, ел ішінде «Дәри­дәй» ақын аталып кеткен Мұ­қаш Сейтқазинов: «Ұлытау облы­сының Жезқазған қаласында үлкен өнер мерекесі – «Ұлытау үні» өтуде. Бастауын өткен ғасыр­дың 90-жылдарында алған бұл өнер додасының мен тұңғыш жүлдегерімін. Оны бүгін барша ақындар тілге тиек етіп жатыр. Ол кезде Алғысхат қана алатынбыз», дейді.

«Ұлытау үні» республикалық фес­тивалінің гала-концертінде фестиваль­да бәйгеден озып, бағы мен бабы жан­ған жас­тар өнер көр­сетті. Сонымен қа­тар ұлы­тау­лықтар эстрада жұл­дыз­да­ры Тамара Асар, Мөлдір Әуел­бекова, Ұш­қын Жамалбектің орындауындағы ән­дерді сүйсіне тыңдады.

Әуелде облыстық, кейін ай­мақ­тық, қазір республикалық мәртебеге ие болған «Ұлытау үні» фестивалі – талай дарынды жастың талабын ұштап, үмітін үкілеп, қалауына қанат байлады.

Ұлытау облысы