Болашаққа деген сенімі бекем

Бұл мәліметтер Президент жанын­­дағы ҚСЗИ тапсырысы бо­йынша биылғы 13 маусым мен 2 шілде аралығында жүр­гізілген әлеу­мет­танулық зерттеу аясында анықталды. Бетпе-бет сұхбат (face-to-face) әдісімен жүргізілген сауалнамаға еліміздің барлық өңірінен, сондай-ақ Астана, Алматы, Шымкент қалаларынан 18 жастан асқан 8000 тұрғын қатысты.

Халықтың әлеуметтік көңіл күйі адамдардың өз өміріне, ма­те­­­риалдық жағдайына және бола­­шаққа деген сенім деңгейіне қандай баға беретіні арқылы анық­та­лады. Зерттеу нәтижелері осы көрсеткіштердің барлығы бо­йынша респонденттердің жауапта­рын­да оң көзқарас басым екенін көр­сетті.

Айта кетерлігі, ең жоғары көр­сет­кіш өмірге ризалық деңгейі бо­йынша тіркелген. Сауалнамаға қаты­­сушылардың 63,3%-ы өз өмі­рі­не толық риза екенін жеткізсе, тағы 31,9%-ы көп жағдайда қанағат біл­діреді. Осылайша, респон­дент­тер­дің 95,2%-ы өз өміріне оң баға береді. Ал 3,4%-ы өз өміріне онша риза, 1,1%-ы мүлде риза еместігін ашып айтқан.

Жалпы, өз өміріне берілген оң баға отбасының материалдық жағдайын қабылдау деңгейінен де көрініс табады. Зерттеуге қатысу­шы­лардың үштен екісінен көбі (67,6%) отбасыларының ма­­­териал­­дық жағдайы кейінгі жыл­да жақ­сар­ғанын айтқан. Оның ішінде 29,8%-ы жағдайы айтар­лық­тай жақсар­ғанын, ал 37,8%-ы белгілі бір дең­гейде жақсар­ғанын атап өтіпті.

Респонденттердің 25,5%-ы отба­сының материалдық жағдайы өзгермегенін айтса, 6,6%-ы нашарлай түсті деп санайды.

Азаматтардың бүгінгі күнге берген бағасы болашаққа деген үміт деңгейіне әсер етеді. Зерттеу қорытындысында сауалнамаға қатысқандардың басым бөлігі өз отбасының келешегіне сеніммен қарайды. Мысалы, он респонденттің шамамен сегізі (78,6%) бір жылдан кейін бүгінгі күннен жақсырақ өмір сүретініне сенеді. Оның ішінде 45%-ы өз жағдайы айтарлықтай жақсарады деп үміттенсе, тағы 33,6%-ы белгілі бір деңгейде жақ­са­ра­­тынынан үмітті. Сондай-ақ 15,9%-ы өз отбасының тұрмыс деңгейі өзге­ріссіз қалады деп есептейді. Ал рес­пондент- тердің 3,4%-ы өз жағдайы нашарлауы мүмкін деп санайтынын айтқан.