Алғашқы ат басын бұрған нысан Шымкент сауда-логистикалық орталығы. Бұл жердегі 5 гектар аумақта «НМИ-Юг» ЖШС-ның көпсалалы қойма кешені салынып жатыр. Аталған жобаның құны – 10,2 млрд теңгені құрайды. Құрылыстың бірінші кезеңін биыл аяқтау жоспарланып отыр. Бүгінгі таңда бірінші кезеңнің құрылыс-монтаждау жұмыстары бітуге таяу. Қойма үй-жайларының жалпы ауданы – 22 мың шаршы метр. Серіктестік құрылтайшысы Айжан Наимбекова салынып жатқан нысан климаттық бақылаудың икемді жүйесі, тоңазытқыш камераларының температурасын -18-ден + 4 градусқа дейін реттеу мүмкіндігі бар А + санатындағы қойма болатынын айтады. Және заманауи қоймада тауарлардың кең ассортиментін сақтауға мүмкіндік туады.
Вице-премьер іссапар аясында «Alsera kz» ЖШС-ның жылыжай кешені жобасымен танысты. 650 млн долларға бағаланған инвестициялық жобаны «Бозарық» индустриялық аймағында жүзеге асырушы «Alarko Holding» шетелдік түрік компаниясы. Инвестор жаңа технологияларды қолдана отырып, 500 гектар алаңда бірнеше кезең аралығында жылыжай құрылысын жүргізеді. Заманауи жылыжай кешенінде қияр, қызанақ, бақша дақылдары мен басқа да ауыл шаруашылығы өнімдері өсіріледі. Келешекте бұл нысан Шымкенттегі жабық кешенде көкөніс өндіретін ең үлкен жылыжай атанбақ, сондай-ақ осы жобаның аясында екі мыңға жуық жаңа жұмыс орындары ашылады.
Үкімет басшысының орынбасарына қала әкімі Ғабит Сыздықбеков сауда-логистикалық орталығында іске асырылатын басқа да жобалар туралы баяндады. Өз кезегінде С.Жұманғарин аталған жобалардың келешегі мен перспективаларын жоғары бағалап, мемлекет тарапынан барлық қажетті қолдаулар көрсетілетінін мәлімдеді. Вице-премьердің айтуынша агроөнәркәсіптік кешендер бойынша мемлекет ұстанған саясат – ауыл шаруашылығы өнімдерін терең өңдеу көлемін 70% жеткізу болса, сауда-логистикалық орталығындағы жаңа жобалар сол нәтижеге жетуге мүмкіндік береді.
«AZALA Textile» ЖШС Қазақстандағы дайын тоқыма өнімдерін өңдеп шығаратын, жабық циклді жалғыз ірі тоқыма фабрикасы саналады. Осы орайда вице-премьер аталған кәсіпорын жұмысымен жақынырақ танысты. Бүгінгі таңда фабрикада 475 адам жұмыс істейді. Бірегей тоқыма комбинаты иірілген жіптен әртүрлі дайын тоқыма бұйымдарын шығарады. Кәсіпорынның жылдық қуаттылығы 6 800 тоннадан астам иірілген жіп пен 14 млн сызықтық метрлі ауыр маталар өндіруге қауқарлы. Тоқыма фабрикасының өнімдері негізінен экспортқа бағытталған. Яғни «AZALA Textile» өндірген тауарының шамамен 70% таяу шет елдерге, Литва, Германия, Италия, Польша, Бельгия, Дания, Латвия мен Түркияға жөнелтеді. Өндірістік цехтарды аралап, зауыт басшылығымен емен-жарқын әңгімелескен Үкімет басшысының орынбасары іссапарының қорытындысында отандық тоқыма өндірушісінің өніміне мемлекеттік сатып алуды ұлғайту мүмкіндігі үкіметтік деңгейде пысықталатынын жеткізді.
ШЫМКЕНТ
