Кеше еліміз бойынша, нақтылай айтқанда, облыстық, қалалық, аудандық кітапханалар мен Достық үйлерінде, сондай-ақ, жоғары оқу орындарында бір уақытта мемлекеттік тілде «Мәңгілік Ел» Патриоттық акциясына арналған жалпықазақстандық ашық диктант жазу шарасы өтті.
Қазақстан халқы Ассамблеясының бастамасымен синхронды түрде ұйымдастырылған акцияға 3 мыңнан астам кітапханадан бөлек, ЖОО-лар мен Достық үйлері белсене атсалысты. Ел азаматтарының патриоттық сезімдерін нығайта түсуді, сондай-ақ, қазақ тілінің мәртебесін көтеруді мақсат еткен, Тәуелсіздігіміздің 25 жылдығына орай қолға алынған шараға ұлты, кәсібі, жас ерекшелігі әртүрлі 20 мыңнан астам адам қатысты.
Акцияның Астанадағы Ұлттық академиялық кітапханада ұйымдастырылған ашылу рәсімінде Қазақстан халқы Ассамблеясы Төрағасының орынбасары – Хатшылық меңгерушісі Ералы Тоғжанов бұл шараның қоғамымызға, әсіресе, жастарға өте қажет екеніне тоқтала келіп: «Тәуелсіздіктен асқан қасиетті ұғым жоқ. Ол біздің басты құндылығымыз. Мұны біз жұртшылыққа түсіндіре білуіміз керек. Сондықтан, осындай акцияны өткізуді қолға алдық. Мұндағы мақсатымыз – «Мәңгілік Ел» идеясын халық арасына кеңінен насихаттап, оның мән-маңызын түсіндіру», – деді.
Бұдан кейін сөз алған мемлекет қайраткері, белгілі ғалым Мырзатай Жолдасбеков диктант жазуға келген азаматтарға сәттілік тілеп, барлығының жоғары баға алуларына тілектес екендігін білдірді.
Өзіміз куә болған, яғни Астанадағы Ұлттық академиялық кітапханада өткен диктант жазу шарасына ұлттық компаниялар мен мемлекеттік органдардың қызметкерлері, жастар, Ұлттық ұлан және Астананың барлық этномәдени бірлестіктерінің өкілдері қатысты.
Айта кетейік, 230 сөзден тұратын диктант мәтінін отандық ғалымдар дайындаған. Оның мазмұны патриоттық тақырыпқа негізделген.
Жалпы, диктантты филолог оқытушылар тексереді. Қорытындысы бойынша «өте жақсы» баға алғандардың есімдері атап өтіледі. Мұны жыл сайынғы дәстүрге айналдыру жоспарлануда. Акция қорытындысы бүгін белгілі болады деп күтілуде.
Жолдыбай БАЗАР,
«Егемен Қазақстан»