Мәдениет және спорт министрі Арыстанбек Мұхамедиұлының халық алдында есеп беру кездесуі өтті. Ел тұрғындары мәдениет, өнер, спорт, тілдердің дамуы, үкіметтік емес ұйымдардың қызметі және дін саласындағы өздерін қызықтыратын сұрақтарына министрден тікелей жауап алды.
Кездесуге келген қалың жұртшылық қана емес, еліміздің барлық аймақтарының тұрғындары да сұрақ қою мүмкіндігіне ие болды. Өзге облыстардың өкілдері үшін министрліктің ресми сайтында сұрақ қою функциясы бар арнайы бөлім ашылды.
Кездесу барысында Арыстанбек Мұхамедиұлы Министрліктің есеп беру кезіндегі қызметі туралы баяндап, құзырындағы салаларда атқарылып жатқан жұмыстар мен мемлекеттік органның болашақ жоспарларымен бөлісті.
Ведомство басшысы баяндамасының басты тақырыптары Елбасының бес институттық реформасын іске асыру бойынша «100 нақты қадам» Ұлт Жоспары, Қазақстан Республикасының Мәдени саясат тұжырымдамасы және т.б. мемлекеттік құжаттарда көзделген мақсат-міндеттерді орындау үрдісінің өзекті мәселелерін қамтыды.
«Ұлт Жоспарын іске асыру мақсатында 2015 жылы саланы жаңғыртуға бағытталған 19 нормативтік-құқықтық акті қабылданды. Мәдениет саласында «Қазақстан Республикасының кейбір заңнамалық актілеріне мәдениет және тарихи-мәдени мұра мәселелері бойынша өзгерістер мен толықтырулар енгізу туралы» Қазақстан Республикасының Заңы қабылданды», – деді министр.
«Сондай-ақ, Заңның нормаларын іске асыру мақсатында 2015 жылы мәдениет және өнер салалары бойынша салалық көркемдік кеңестер құрылып, табысты қызмет етуде. Мәдени саясат тұжырымдамасына енгізілген өзгерістер мен толықтырулар шеңберінде мәдени-туристік кластерлерді одан әрі дамытуға ерекше мән берілді», – деді А.Мұхамедиұлы.
Сондай-ақ, келер жылы Астанада өтетін ЭКСПО-2017 халықаралық көрмесіне арналған Кешенді мәдени бағдарлама әзірленгенін де атап өтті.
Қазіргі уақытта Қазақстанның мәдениеттегі мәртебесін көтеріп тұрған саланың бірі кино десек артық болмас. Басқосу барысында Министр бұл тақырыпты да айналып өтпеді.
«Отандық кинематографияның одан әрі дамуы үшін биыл елімізде киноөндірісін дамыту тұжырымдамасы жасалады. Сонымен қатар, кино туралы бөлек заң әзірлеу мәселесі де қарастырылуда, өйткені, «Мәдениет туралы» Заңда ұлттық киноөндірісті қолдауға байланысты барлық аспектілерді толыққанды қарастыру, саланың ұзақмерзімді дамуының басымдықтарын анықтау мүмкін емес», – деп сөзін жалғастырды министр.
Бұдан бөлек, есеп беру аясында отандық спорт және дене шынықтырудың даму болашағы, Рио-де-Жанейродағы Олимпиада ойындарына дайындық барысы да баяндалды.
Сонымен қатар, «Тілдерді дамыту бөлімі қоғамдық-саяси жұмыс саласында министрлік алға қойған барлық міндеттерді белсенді іске асыруда», – деді министр.
Ол 2015 жылы мемлекеттік органдар, кітапханалар, тілдерді дамыту және білім беру жөніндегі аймақтық мекемелер бойынша таратылған 6 сөздік, балалар әдебиетінің 10 түрі, 11 оқу-әдістемелік құралдар шығарылғандығын қоса айтты. Балалардың сөйлеу қабілеттерін дамыту барысында 15 томнан тұратын аудиокітаптар жинағы, 50 бөлімді анимациялық фильм шығарылғанын мақтанышпен жеткізді.
Татулық пен бейбіт өмірді бейнелейтін Ислам дінінің келешегі де келелі кездесуде кеңінен қозғалды.
Жиын соңында министр еліміздің дамуына елеулі үлес қосып келе жатқан Мәдениет және спорт министрлігінің алдағы уақытта атқарар қызмет ауқымы үлкен екенін және жүктелген міндеттерді жұмыла көтеретіндіктерін алға тартты.
Рауан ҚАЙДАР,
«Егемен Қазақстан»