Сағадат Нұрмағамбетов туралы деректі фильм Севастопольден жүлдемен оралды
Кеңес Одағының Батыры, Халық қаһарманы, тәуелсіз Қазақстанның тұңғыш Қорғаныс министрі туралы түсірілген деректі фильм таяуда Севастопольде өткен ХІІ халықаралық деректі фильмдер кинофестивалі мен «Победили вместе» телебағдарламасының үздік портреттік телеочеркі ретінде мойындалды.
Шәкен Айманов атындағы «Қазақфильм» киностудиясы» АҚ түсірген «Сағадат Нұрмағамбетов. Соңғы сұхбат» деп аталатын картина режиссері Сатыбалды Текеев.
Сонымен, 14-19 мамыр аралығында өткен деректі фильмдер фестивалінде армия генералы Сағадат Нұрмағамбетов жайлы лента көрермендеріне көп әсер сыйлай отырып, кинематографтар тарапынан тамаша бағаға ие болған.
Аса мәртебелі саналатын аталмыш кинофестиваль 2006 жылдан бері Қырымда тұратын Кеңес Одағы Батырларының бастамасымен үздіксіз өткізіліп келеді. Майдандас достар мен екінші дүниежүзілік соғысты және онда қан төккен қатысушы елдердің қаһармандарын ұмыттырмау мақсатында ұйымдастырылып келе жатқан кинофестиваль қоржынына 24 мемлекеттен 150 жұмыс келіп түскен. Оның ішінде АҚШ, Канада, Куба, Қытай елдерінен қатысқан деректі дүниелер де бар.
Айнаш ЕСАЛИ,
«Егемен Қазақстан»