Қазақ Географиялық қоғамы Shejire DNA жобасымен және норвегиялық ғалымдармен бірлесе отырып, Қазақстан мен Скандинавия арасындағы этнографиялық және мәдени байланыстар зерттелетін ғылыми жобаны жүзеге асыруда.
Алматы қаласында Қазақстанның тарихы мен мәдениеті туралы деректі фильм түсірумен, сондай-ақ ел тұрғындарының этногенетикалық сәйкестіктерін ғылыми тұрғыда зерттеп жүрген норвегиялық ғалымдар делегациясы өз еңбектерінің есебімен тілшілер қауымын таныстырды.
Халықаралық ғалымдар тобы «ежелде Орталық Азия үндіеуропалық тілдердің орталығы болған» деген болжамға сай, Қазақстан мен Скандинавия халықтарының этнографиялық және мәдени байланыстары туралы гипотезаны бірнеше жылдар бойы зерттеп келеді. Осы ғылыми жоба әлем ғалымдарының назарын өзіне аударып, елімізде норвегиялық «NRK» телеарнасы түсіріп жүрген ғылыми-танымдық бағдарламаның басты эпизодына айналып отыр.
Қазақ Географиялық қоғамының негізгі бағыттарының бірі – бүкіл әлемге Қазақ елінің мәдениетін, тарихын таныстыру болғандықтан, аталмыш жоба отандық географиялық қоғам тарапынан да зор қолдауға ие болуда.
Қазақстан халқы Ассамблеясының қолдауымен өткізілген бұл басқосуда норвегиялық ғалым әрі «NRK» телеарнасының журналисті Джо Рослиен журналистерге арналған шеберлік-сынып өткізіп, тарихшы-ғалым Струла Еллингваг, «Қазақ Географиялық Қоғамы» төрағасының орынбасары, Shejire DNA project директоры Нұрбол Баймұханов түрлі ғылыми тұжырымдамаларымен бөлісті.
Қанат ЕСКЕНДІР,
«Егемен Қазақстан»
АЛМАТЫ