Кеше «Ақтөбе ақпарат» орталығында облыс әкімі Бердібек Сапарбаев БАҚ өкілдерімен брифинг өткізіп, террористік оқиғаға байланысты мәлімдеме жасады, нақты жағдайдан хабардар етті.
Өңір басшысы қазіргі кезде облыстағы жағдайдың жергілікті атқарушы билік пен құқық қорғау органдарының бақылауында екенін, облыс әкімдігінде өңірлік жедел штаб жұмысы ұйымдастырылғанын, Ұлттық қауіпсіздік департаментінің жетекшілігімен террорға қарсы орталық жұмыс істеуде екенін жеткізді. Барлық құқық қорғау және арнайы органдармен тығыз байланыс орнатылғанын атап өтті.
– Қару-жарақ дүкені мен ұлттық гвардия әскери бөліміне жасалған шабуылға қатысы бар қалған қылмыскерлерді жою бойынша іс-шаралар жалғасуда. Қазіргі кезде 12 қылмыскердің көзі жойылып, 5-еуі ұсталды, қалған қылмыскерлердің жеке басының мәліметтері анықталып, оларды ұстау бойынша жедел іс-шаралар жүріп жатыр. Бүгін медициналық мекемелерге бірнеше жараланғандар әкелінді, олардың арасында бейбіт тұрғындар мен құқық қорғау органдарының қызметкерлері жоқ, негізінен әкелінгендер қылмыскерлер. Кеше қаза тапқан әскери қызметкерлердің отбасыларына материалдық көмек көрсетілетін болды. Барлық коммуналдық қызметтер, қоғамдық көліктер мен медициналық мекемелер штаттық режімде жұмыс жасауда.
Сонымен қатар, біз тұрғындардың антитеррористік операцияларды жүргізу барысында халық көп шоғырланатын жерлер мен көңіл көтеру орындарына бармауына кеңес береміз. Мемлекеттік органдардың жүргізіп жатқан жұмыстарына, оның ішінде құқық қорғау органдарының құжаттарды тексеру әрекетіне түсіністікпен қарап, қажеттілігіне қарай тиісті қолдау көрсетулеріңізді сұраймыз. Түрлі әңгімелерге бой алдырмай, тек қана мемлекеттік органдардың ресми ақпараттарын басшылыққа алуларыңызды сұраймыз, – деді Бердібек Мәшбекұлы.
Қазір қалада лаңкестерді құрықтау операциясы жалғасуда. Облыс орталығында террорлық әрекетке қарсы күшейтілген режім енгізілді.
Сатыбалды СӘУІРБАЙ, «Егемен Қазақстан» Ақтөбе облысы