ЕҚЫҰ-ның Іс басындағы төрағасы, Литваның Сыртқы істер министрі Аудронюс Ажубалис Қазақстан Президенті Нұрсұлтан Назарбаевтың өзінің өкілеттігі мерзімін ұзарту жөнінде референдум өткізбеу туралы шешіміне қолдау білдірді. Шешім Конституциялық Кеңес Президенттің өкілеттік мерзімін референдум арқылы ұзарту туралы заң Конституциялық емес деп танығаннан кейін қабылданған болатын.
Ажубалис, сондай-ақ Президент Назарбаевтың мерзімінен бұрын президенттік сайлау өткізу туралы ұсынысын қаперге алды.
«Ұйымның соңғы 11 жылдан кейін тұңғыш рет өткізілген Астанадағы ЕҚЫҰ Саммитінде біз ақылға қонымды аралықта демократиялық сайлаулар өткізуге қатысты мәселені қоса алғанда, ЕҚЫҰ міндеттемелеріне адалдығымызды тағы да қуаттаған болатынбыз. Бұл міндеттемелер барлық қатысушы мемлекеттерде сақталуы тиіс. Мен Қазақстан басшылығына аталған мәселеде қолдау білдіремін», – деп мәлімдеген ЕҚЫҰ-ның Іс басындағы төрағасы.