Қазақстан халқы жыл сайынғы Президент Жолдауын асыға күтуді үйреншікті дағдыға айналдырғалы көп болды. Сонау 90-жылдардың соңында еліміз ең қарапайым тұрмыстық проблемалардан күйзеліп, Елбасының батыл да оптимизмге толы жоспарларына тұрғындар әрі үмітпен, әрі күдікпен қараған кездерді де бастан кештік. Болашақ дамуымыздың бастауы «Қазақстан-2030» Стратегиялық бағдарламасы болды. Оның өзі жыл өткен сайын позитивтік толықтырулармен байытылып келетініне де көз бен құлақ қана емес, бүгінгі шынайы болмысымыз куә.
Тәуелсіз Қазақстан – біздің ең басты құндылығымыз. Оның әлемдік озық өркениеттің алдыңғы шебінен өз орнын ойып алып, берік орныға отырып, ілгерілей беруі үшін саяси әлеуетінің биік болуы жеткіліксіз. Ол үшін алдымен өзіндік жаңа негізде үздіксіз дамитын тәуелсіз экономикасы қалыптасуы керек екенін Елбасы талмай айтып қана қоймай, ылғи да тиімді идеялар мен жобалар ұсынып келеді. Соның бірі әрі бірегейі – былтыр іске асырыла бастаған Инновациялық индустрияландырудың үдемелі жоспары. Оның бір жылдағы орындалған жобаларының өзі таяудағы 5-10 жылда еліміздің экономикасы шикізат өндіру тәуелділігінен біржолата құтылып, тұтынуға дайын өнім шығарып тарату деңгейіне көтерілетініне көз жеткізіп отыр.
Биылғы Жолдауда осы тарапта іске асырылатын шаралардың экономикамызды қалай түрлендіретініне нақты да дәйекті дәлелдер келтірілген.
Ұлы экономист-философ К.Маркс айтқандай, адамдар саясатпен, көркемөнермен, философиямен айналысуы үшін алдымен қорегі, киімі және баспанасы болатындай жағдайға жетуі керек. Әрине, бұл – ең қарапайым, бірақ қай заманда да мәнін жоғалтпайтын ең қажетті өлшем. Қазіргі тілмен айтқанда экономиканың дамуы алдымен халықтың әл-ауқатының, тұрмыс, өмір сүру деңгейінің жақсара түсуіне қызмет етуі керек.
Бұл мәселеде сонау социализм дәуірінен мұраға қалған, шешімін толық таппаған күрделі мәселелер көп-ақ. Әлемдік қаржылық-экономикалық дағдарыстың қыспағына тап болған соңғы өткен 2 жыл ішінде қиын күндері қажет болады деп жиналған қор қаражаттың едәуір бөлігін басталған әлеуметтік мәндегі нысандардың құрылысын аяқтау, жолдар салу-жөндеу, елді мекендерді аббаттандыру, тұрғын үй-коммуналдық шаруашылықтарды қайта жөндеу, жаңалауға жұмсаудың өзі Мемлекет басшысының асқан көрегендігі болды. Мұндай шараға 1930 жылдары АҚШ президенті Ф.Д.Рузвельт тәуекел етіп, үлкен нәтижеге қол жеткізіп, елінің тарихына өз атын алтын әріптермен жаздырып қалдырған еді. Біздің Нұрекең де қиын шақта осындай деңгейден көріне білді.
Сондықтан да халқымыз Елбасына алдағы дамуымыздың тағдырын сеніп тапсыруы керек деп білеміз.
Әлмұқан ИСАҚ, Жамбыл облысының құрметті азаматы.
Тараз.