Еліміз Парламенті Мәжілісінің Төрағасы Бақтықожа Ізмұхамбетов Ресей Федерациясының Қазақстандағы Төтенше және өкілетті елшісі Михаил Бочарниковті қабылдады, деп хабарлады Мәжілістің баспасөз қызметі.
Тараптар екі мемлекет президенттерінің салиқалы саясатының арқасында қарқынды дамып келе жатқан Қазақстан мен Ресей арасындағы стратегиялық әріптестік жайына айрықша назар аударды.
Мәжіліс Төрағасы мейманды жыл сайын 12 маусымда аталып өтетін Ресей күні мерекесімен құттықтай келіп, Ресей Федерациясы әр кезде Қазақстанның маңызды әріптесі әрі одақтасы және сенімді досы болып қала беретінін жеткізді.
Өз кезегінде елші кешегі ұлттық аза тұту күніне байланысты көңіл айту білдірді.
Осы ретте Мәжіліс Төрағасы Ақтөбеде орын алған аяусыз, қаскөй лаңкестік әрекетті айыптай келіп: «Бұл біздің жас мемлекетіміз үшін ащы сабақ болды. Қоғамдық келісім, саяси тұрақтылық біздің көп ұлтты Қазақстанымыздың басты құндылықтары болып табылады. Елбасымыз, Үкімет, Парламент, басқа да құзырлы органдар алдағы уақытта мұндай жағдайдың алдын алу үшін тиісті шараларды қолға алатыны сөзсіз», – деді.
Одан әрі тараптар екі мемлекет арасындағы халықаралық қауіпсіздік, мәдени-гуманитарлық байланыс мәселелерін талқылады. Кездесу иелері әлемдік экономикалық дағдарыс екі ел арасындағы сауда-экономикалық қарым-қатынастың дамуына өз салқынын тигізгенін, алайда, өткен жылдың қаңтар айынан іске кіріскен ЕАЭО біздің елдеріміздің ұлттық экономикасын тұрақтандыруда айрықша рөл атқарып келе жатқанын атап өтті.
Қазақстан-Ресей әріптестігінің барлық салада жан-жақты, табысты дамып келе жатқанын алға тартқан М. Бочарников 2017 жылы екі ел арасында дипломатиялық қарым-қатынастың орнағанына 25 жыл толатынын еске салды.
Б.Ізмұхамбетов пен М.Бочар-
ников парламентаралық ынтымақтастықты нығайтудың маңыздылығына да назар аударды. Қазіргі уақытта Парламент Мәжілісі мен Мемлекеттік Дума арасында өзара іс-қимыл орнатылған. Палаталар арасында ынтымақтастық туралы келісім бар. Депутаттар ТМД Парламентаралық Ассамблеясы, ҰҚШҰ, ЕҚЫҰ Парламенттік Ассамблеясы аясында жемісті еңбек етуде.
Мәжіліс Спикері атап өткендей, Ресей Федерациясы Федералдық Жиналысы Федерация Кеңесінің Төрайымы Валентина Матвиенконың жуырдағы Қазақстанға сапары парламентаралық ынтымақтастықты дамытуға өзіндік серпін берген.