Бақ шаппайды, бап шабады

Ойды ой қозғайды. Осыдан бес жыл бұрын Италияның Турин қаласында өткен қысқы Олимпия ойындары кезінде елдің екінші қа­ласында 20 градус жылылықты көр­сетіп, ол шаңғышыларға көп ауырт­палық жүктеген еді. Алайда, биіктігі 3 мың метрден асатын Альпі таулары етегінде өтіп жатқан шаң­ғы жарыстары кезінде -2 -3 гра­дусты көрсетіп тұрды. Бір қызым бір қызымнан сорақы дегендей, Алматыдағы ауа райы +10 градустан асып 5 және 10 шақы­рымдық шаңғышылар жа­ры­сы кезінде Ал­ма­тының ақ жауыны то­лассыз сіркіреп кетті. Өкінішке орай, қыз­дары­мыз тағы да тобық­тай жапон қыз­дарының көлеңке­сінде қалып қой­ды. Жа­пон­­ның қос жұлдызы Ишида Масако мен Надсуми Мадока мәре сызығын бірінен кейін бірі қиып алтын мен күмісті қағып түс­ті. Үшінші орында Қытайдың қара қызы Ли Хонгкие, Елена Коломина мен Светлана Малахова төр­тінші, бесінші орындарды қа­на­ғат тұтты. Жарыс аяқталғаннан кейін С.Ма­лаховамен тілдесіп үлгердік. – Шаршағанымыз рас, алтын алмасақ та жүлдегерлер қатарына ілігеміз бе деп бар күшімізді са­лып едік. Амал бар ма, жапонның қос қызы бізден айласын асырып кетті. Шаңғы майлауда да кемшілік бол­ды ма деп ойлаймын, – деді ентігін баса алмай тұрған жерлесіміз. Біздіңше, мәселе шаңғы майлауда емес сияқты. Бұл жерде мәселе бапкерлердің қателігінде шығар. Жапон мен қытай қыз­дары Астана мен Алматыдағы Азия ойындары басталар кезде Әлем кубогының соңғы кезең­деріне қатысқан жоқ. Яғни, олар тактикалық жағынан ұтып, Қа­зақ­станға тың әрі сергек келді. Оның үстіне, жасыратыны жоқ, қыздарымыз шаршап қалған сияқты. Жастарының да келіп қалғанын назардан шығармаған жөн. Демек, оларға лайық ізбасарлар әзірлесек, ұтарымыз анық. Қыздар жарысында 8 жүйрік болса, 10 шақырымдық шаңғы жа­ры­сында 6 азаматымыз жарыс жо­лына шықты. Жаңбыр толастар емес. Ауа райының қолайсыз­дығы­на қарамастан жанкүйер­лердің ай­қайы Солдатсай аума­ғын күмбір­летіп жіберді. 5 ша­қы­рымда Алексей Полторанин 0,3 секөнтпен көш бастағанда қуа­нып едік. Тағы да жапонның қос жүйрігі Юшида мен Шимизу біраздан кейін Алексей мен Николай Чебатьконы шаң қап­тырып кетті. Әттең! Қолда тұрған ал­тын­нан тағы да айрылып қал­дық. Нәтижесінде Николай Чебатько екінші, Алексей Полторанин үшін­ші болып мәре сызығын қиды. – Ауа райының қолайсыз бол­ғаны белгілі, бірақ та жігіттер қанша талпынғанмен шаңғы майы сай келмей кібіртіктеп қала берді. Бүгін жігіттеріміз демала­ды, эс­тафетада есемізді жібермейтін шы­­­ғармыз, –  деп ағынан жа­рыл­ды жарыстан кейін Риддердегі да­рынды балаларға ар­нал­­ған спорт мектебінің дирек­торы, белгілі шаң­­ғышы Владимир Кнауб. Риддердегі спорт мектебінде қа­зір 150-ге жуық бала жат­ты­ғуда. Оның ішінде Үржардағы белгілі бапкер Қайникамал Жүсі­п­ованың бір­неше шәкірті білімі мен біліктілігін жетілдіріп жа­тыр. Жас­өспірімдер арасында әлем чемпио­натының жүл­де­герлері де көрінуде. Ендеше, берерін беріп, алғанын ал­ған шаң­ғышы қыз-жігіттерге сенім арта бермей, осындай талантты жас­тарға көңіл аударсақ, ұпайы­мыз түгел болары сөзсіз. Сонда ға­на қыс­қы спорт түр­лерінен қазақ елі Олимпия ойын­дарында көш со­ңын­да қа­лып қой­майтыны сөзсіз. Бұл енді барлық жанкүйерлердің жүре­гі­­нен шыққан тілегі. Сон­дықтан бапкерлер мен басшы­ларға осы ба­ғыт­та жұмыс істеп, еліміздің намы­сы үшін барын салатын кезі жетті деп ойлаймыз! Оңдасын ЕЛУБАЙ.