«Құс қанатты» жігіт

Қазақстандық тұғырдан секірушілер арасында ең жасы, «ұш­қыш шаңғышы» атанған Евгений Левкин К-95 трамплинінен секіруден алтын медальді жеңіп ал­ды!  Отан­дасымыз  сайыстың екі раундында үздік нәтиже көрсетті. Спортшы 252 ұпай жинады. Екінші орында 248,5 ұпай жинаған, К-125 трамплинінен секіру бо­йын­ша Азиада чемпионы атанған – жапондық Казуя Йошиока. Үшінші орын 244 ұпай алған келесі қазақстандық спорт­шының еншісінде – Радик Жапаров қола жүлдегер! Бұл 10 жастан бері спортпен айналысып жүрген 18 жастағы Евгений Левкинннің алғашқы ал­тын жүлдесі. Үлкен келешегі бар жас спортшы сайыс күндерінің ба­ры­сын­да үздік нәтижелер көр­сетіп, жа­пондықтар алтын ала­ты­нына сенімді болғанына қа­ра­мастан, өзінің бас жүлдеге ла­йық еке­н­дігін дә­лел­де­ген еді. Жарыс біткеннен кейін ал­дымен БАҚ өкіл­дерінің қолпа­шы­на ие болған Евгений журна­лис­тер­дің жабыла қойған жалғыз сұрағына: – Қуанышым қойныма сый­май тұр. Жапон Казуя Йошио­ка­ны бас қарсыласым деп санадым. Алайда, мен одан мықты болып шық­тым. Азиада чемпионы атан­ғаны­ма әлі сенбей тұрмын. Жеңісімді ата-анама арнаймын! – деді. Бұл кезде Жапония спорт­шы­лары жабырқаулы болатын. Бар­лық кезде ұстамды болып келген Жапония құрамасының тұғырдан секіру бойынша жаттық­тыру­шысы Кенджи Сюда К-95 трамплинінде өткен жарыстардан кейін көңілі өте төмен болды: – Мен Азиадаға ең үздік спорт­шыларды алып келгенмін. Және біздер трамплиннен секіру са­йыс­тарының барлық алтын­дарын же­ңіп алатынымызға сенген едік. Болмады... Жарыс алдында Халықаралық трамплиндер кешенін тұман ба­сып, жаңбыр сіркіреп тұрды. Алайда, Қазақстанның трамплиннен секіру федерациясы өкілдері  жарыс­тарды кейінге қалдырудың қажеті жоқ, сайыс бекітілген кесте бойын­ша өтеді, деп мәлім­деген болатын. Шаңғымен тұғыр­дан секіру бо­йын­ша Азиаданың жарыстар ди­рек­циясы ауаның жоғары ылғал­ды­лығы мен тұман К-95 трамплинінде жеке секірушілер арасынан үз­діктерді тануға кедергі болмай­ды, деп сендірді. Алаңдаулы жұртқа Қазақстан құ­рамасының секірушісі Константин Королев: «Жылдамдық алатын аймақты жақсы дайындап қойды. Қар жақсы нығыздалған. Әрине, жаңбыр жауып тұрған соң кей жерлер батпақ. Бірақ жарыс­тарға ол кедергі келтірмейді. Біз сайысты бас­тауға әзірміз. Жақсы көрсеткіш­терге қол жеткіземіз деп ойлаймыз» деп ой бө­ліс­кен еді. Трамплин қыз­мет­керлері: –  Төрешілер спортшыларды, ал спортшылар трамплиннің бар аймағын көріп тұрады. Сон­дық­тан жарыстар қалыпты жұмыс тәртібінде өтеді. Секірушілер ауа райының барлық жағдайына да­йын, олар анау-мынауға таң­ғалып, абыржи қоймайды, – деді. Халықаралық трамплиндер кешені осылайша  алдын-ала, бір күн бұрын К-95 трамплинінен секіру жарыстарына сақадай сайлана бастаған. «Жерге қону» ай­ма­ғына мамандар 30 сантиметр қол­дан жасалған қар шашып үлгерді (халықаралық стандарт бойынша қар қалыңдығы 25 сантиметрден кем болмауы тиіс). Жылдамдық алатын аймақты қатырып жатты. Жарыстардың бас төрешісі Эд­вард Леушин ауа температурасы 8 градустан көтерілмесе, бәрі ойдағыдай болатынына сендіріп: «Егер ауа райы күрт өзгеріп жатса, жарыстарды кейінге қал­дыру­ға хақымыз бар. Тіпті, сайыс­тарды түнде де өткізе аламыз. Трамплиндерге жарық түсіріп тұратын шам көп. Қатты жауын-шашын бола қалса, басылғанша күтеміз. Ал жаңбыр ақырын ғана сіркіреп немесе қар аздап қана жауып тұрса, онда жарысымызды бастай береміз. Біздің басты міндетіміз – трамплиннен секіруші­лердің қауіпсіздігін қамтамасыз ету. Тек Халықаралық шаңғы спорты федерациясы жарыстар өткізуге келісім берсе, онда трамплин – сайыстарға сақадай сай», – деген еді. Сонымен 4 ақпан Қазақстан, Жапония, Корея және Қытайдың трамплиннен секіру жарыс­тары­на қатысатын спортшылары үшін сайыстың соңғы күні болатын. Мына қызықты қараңыз, жаттығу жарыстары кезінде ең жақсы көрсеткіштерді жапон Казуйоши Фунаки мен корей Чой Хёнг Чул   көрсеткен-ді. Бұл кезде Юхеи Сасаки жапон се­кіру­шілерінің жеңетіндеріне сенімді еді. Байқау кезіндегі алғашқы екі секірістің нәтижесі бойынша, К-95 трамплинінен ең жоғары көрсеткішке жеткен – қазақ­стан­дық Радик Жапаров болатын. Нәтижесінде, жерлесіміз қола жүл­дегер атанды. Айнаш ЕСАЛИ.