Азиада туралы айтқанда, мына бір жайды ескеру керек сияқты. Ресми тұрғыдан осынау жарыстар Астана мен Алматыда өтеді деп есептелгенімен, шаңғымен жүгіру, биатлон және қысқы спорттық бағдарлау сияқты спорт түрлерінің медальдары Алматы облысының аумағында, Талғардың жанындағы табиғаты көркем Солдат- сайында сарапқа салынуда.
Міне, «Ақбұлақ» спорттық-сауықтыру кешеніне көрші қонған, «Медеу» мен «Шымбұлақ», «Табағандарыңыздың» спорттық дәстүрін жалғаған осы ғажабыңыз «Шаңғы-биатлон стадиондары» кешені деп аталып, құлаққа Азиада кезінде жағымды естілетін болып барады.
Стадионның бас жоспарының нобайын FIS-тің норвегиялық сарапшысы Хермуд Бьоркестол атақты консалтингілік компаниямен бірлікте орындап, сол нобай жұмыс жобасының әзірленіміне негіз болып алынған екен. Осынау құрылыстың директоры Сергей Петрович Шаховец Солдатсайындағы шаңғы-биатлон стадиондары кешенінің құрылысы 2008 жылдың желтоқсанында басталып, 2010 жылдың желтоқсанында аяқталғанын тілге тиек етті. Әлемдегі осындай тұрғыдағы төртінші кешен саналатын ол аса ірі құрылыс болып табылады. Кешеннің өзі шаңғы және биатлон стадиондарынан құралған. Екі стадионның біріккен бірегейлігі бірден көзге түседі. Әрбір стадионның мінбері 3 мыңнан астам көрерменге арналған. Директордың айтуынша, жалпы құрылыс алаңы 27 гектар жерді алып жатыр. Мұнда тікелей нысандар орналасқан. Одан басқа, Іле Алатауы ұлттық қорығының жеріне сұғынған 50 гектарды 4400 метрлік биатлон және он шақырымдық шаңғы трассалары шарлап кеткен.
Біз осы арада VІІ қысқы Азия ойындарындағы биатлон бойынша спорт менеджері, республиканың еңбек сіңірген жаттықтырушысы Павел Георгьевич Семеновпен жолықтық. Оның айтуынша, осынау шаңғы-биатлон стадиондарының ғажайыптығы сонда, оның 1500 метр биіктікте жатқандығында. Тіпті, дәл осындай жер бедері, табиғаты түгел келіскен стадион Азия мен Еуропада жоқ көрінеді. Кешенді әдіптей көмкерген сұсты таулардың тап мынадай сұлулығы да басқа жерлерден табыла қоймайды. Осынау қойнауда әр уақыт күншуақ, желсіз тымық жоғары нәтижелерге жетелейтіндей. Стадионда үш мәрте сынамалық маңызды жарыстар өткізіліп үлгерген. Соған сәйкес спортшылардың да, халықаралық шаңғы спорты федерациясы өкілдерінің де кешенге берген бағасы жоғары. Мұндағы трассалар аса күрделі болып табылады. Әрі әлемдік стандарттарға сай келеді. Сондықтан, оған 2018 жылға дейінгі сәйкестік сертификаты беріліпті.
Демек, бұл трассалар мен стадиондарды халықаралық деңгейдегі жарыстар өткізу үшін пайдалануға әбден болады. Осындай жоғары деңгейдегі алғашқы жарыс Азиада болып тұр. Биылғы Азиада өтетін қыс қарға сараңдығын байқатты. Бұл олқылықтың орнын қар жасап атқылайтын зеңбіректер толтыруда.
Ал енді қос қанатты ғимаратқа келер болсақ, оның төртінші қабатында түгелдей комментаторлық кабиналар жайғасқан. Төрешілердің орынжайлары да осы арада. Үшінші қабаттың биігінен жарыстарды «олимпиялық отбасы» мүшелері, яғни Азиаданың мәртебелі виб-қонақтары тамашалай алады. Екінші қабатымызда әрі мінбер, әрі фотосуретшілерге, журналистерге арналған орынжайлар. Баспасөз орталығы да осы қабатқа орналасқан. Бірінші қабаты – галерея. Ең төменгі қабатта спортшылардың киім ауыстыратын бөлмелері, шаңғыларын баптап майлайтын орындар. Дәрігерлердің бөлмелері де осында. Ал ғимараттың төбесіндегі 700 шаршы метрлік алаң да ұтымды пайдаланылып, онда қосымша кабиналар қойылған. Журналистер де, жай көрермендер де ол жерден стадиондағы жарысты алақандағыдай көреді.
Сатып алынған жерлерді, құрылыс жұмыстарын, жабдықтардың бәрін қоса есептегенде, осынау шаңғы және биатлон стадионы кешеніне 20 миллиард теңгеден астам қаржы жұмсалыпты. Әлбетте, Азиада арқылы алатын абыройымыз бұл шығынды артығымен ақтайды деп ойлаймыз. Ал, Азиададан кейін бұл кешен еліміздің шаңғы-биатлон спортын дамытуға септігін тигізе бермек, халқымыздың тағы бір игілігіне айналмақ.
Қорғанбек АМАНЖОЛ.
_______________________
Суреттерді түсірген Берсінбек СӘРСЕНОВ.