Төрағалыққа орай өткен тұсаукесер

Шанхай ынтымақтастық ұйымының хатшылығында Қазақстан Республикасының осы ұйымға төрағалық етуіне байланысты тұсаукесер болды. Оған Қазақстан мен Қытайдың министрліктері мен ведомстволарының өкілдері, Шанхай ынтымақтастық ұйымына мүше мемлекеттердің Бейжіңдегі елшілері мен дипломанттары, ҚХР Ғылыми-зерттеу орталықтарының басшылары қатысты. Көпшілікке мәлім, Қазақтан Рес­публикасы 2016-2017 жылдары Шан­хай ынтымақтастық ұйымына төраға­лық етеді. Осы ұйымның Бас хатшысы Р.Алимовтың айтуына қарағанда, Президент Нұрсұлтан Назар­баевтың басшы­лығымен Қазақстан Тәуелсіздік алған жылдар ішінде сыртқы саясатта стратегиялық маңызды қадамдар жасай білді. – Ташкент саммитінен кейін Шанхай ынтымақтастық ұйымына төраға­лық ету Қазақстан Республикасының иелігіне өтті. Шынын айтқанда, Қазақстан осы ұйым алғашқы құрыл­ған күннен бастап оның дамуына айтарлықтай үлес қосып келеді, – деді Р.Алимов. – Аталған ұйымға төрағалық ету Қазақстанның Біріккен Ұлттар Ұйымы Қауіпсіздік Кеңесінің 2017-2018 жылдардағы тұрақты емес мүшелігіне сайлануымен тұспа-тұс келді. Мұның өзі Қазақстан­­ның аймақтық және әлемдік деңгейде белсенділігі мен абырой-беделінің жоғары екендігін тағы бір мәрте айғақтап берді. Тұсаукесер барысында Шанхай ынтымақтастық ұйымының алдағы басым бағыттары негізгі әңгіме өзегі болды. Бұл жайында Қазақстан Республикасының Қытайдағы Төтенше және өкілетті елшісі Ш.Нұрышев ой-пікірін ортаға салды. – Қазақстан Президенті Нұрсұл­тан Назарбаев жақында ғана Ташкентте өткен саммитте осы ұйымға мүше елдер аймақтық қауіпсіздікті нығайту мен экономикалық ынтымақ­тастықты дамытуды, көлік-транзиттік әлеуетті көтеру мен мәдени-гуманитарлық байланыстарды тереңдетуді басым бағыттар ретінде ұстануды көтерген еді. Сонымен бірге, ұйымға мүше мем­лекеттердің халықаралық терро­ризмге қарсы бірлесе күрес жүргізуі өте маңызды болып отыр. Елбасы айтқан осындай өзекті мәселелер Шанхай ынтымақтастық ұйымының басты басымдықтары болады, – деді Қазақстан елшісі. Қазақстан Президенті Н.Назарбаев­тың ұсынысы бойынша Шанхай ынтымақтастық ұйымының Астана саммиті «ЭКСПО-2017» халықаралық көрмесінің ашылуы қарсаңында 2017 жылы 8-9 маусым күндері өткізілмек. Қазір осы шараға әзірлік жұмыстары басталып кетті. Садық ӘКІЖАНОВ, «Егемен Қазақстан» – Бейжіңнен Қытай Халық Республикасы