Алматы мен Тегеран арасы

әуе жолымен жалғасатын болды Еліміздегі ең ірі әуе тасымалдаушы компания тұңғыш рет Алматыдан Иран астанасы – Тегеранға тікелей қатынайтын әуе рейсін ашты. Бұл екі ел Президенттерінің мемлекетаралық эконо­микалық қатынастарды дамыту жөніндегі келісімінің арқасында жүзеге асып отыр. Ұшақтар аптасына үш рет қатынайды. Алматыдан шыққан ұшақ Тегеранға 2,5 сағатта же­теді. Алдағы уақытта екі мемлекет арасындағы барыс-келіс қатынасы визасыз болуы мүмкін. Жалпы, рейстің ашылуы туризмді дамытуға серпіліс береді. Сыртқы істер минис­трлігінің мә­ліметі бойынша, былтыр Қа­зақстан мен Иран арасындағы сау­да айналымы 1 миллиард АҚШ долларын құраған. Енді жаңа әуе рейсінің ашылуымен екі ел арасындағы жолаушылар тасымалы жылына 7 мың адамға жетеді деген болжам бар. Қазір елімізден Иранға баратын жолаушылардың 60 пайызы – туристер, қалғаны – кәсіпкерлер. – Бүгінде Иранға виза алу қиын емес, күніне 15-20 данасын рәсімдейміз. Біз оны барын­ша жеңілдетуге күш салудамыз. Болашақта Иранға визасыз қа­тынау мәселесі қарастырылып жатыр. Ол үшін Қазақстанмен екіжақты келісім болуы керек. Мұндай қадам бауырлас екі елдің арасындағы қарым-қатынасты одан әрі нығайтуға ықпал етеді деп ойлаймын, – де­ді Иранның Алматыдағы бас кон­сулдығының екінші консулы Махмуд Асади. Қанат ЕСКЕНДІР, «Егемен Қазақстан» АЛМАТЫ