Ұлы Дала мұратын ұлықтаған фестиваль

Астана күніне орай елордадағы Абай ескерткішінің алдында ашық аспан аясында ерекше мерекелік шара өтті. «Ұлы Дала, ұлт мұраты, ұрпақ болашағы, Мәңгілік Ел – Тәуелсіз Қазақстан!» тақырыбымен өткен кітап және поэзия фестивалін қала әкімдігі мен «Нұр Отан» партия­сы және Орталықтандырылған кітапханалар жүйесі ұйымдастырған болатын. Бұл шара бабадан қалған байтақ даламызда бағзы заман мен болашақтың арасындағы нәзік байланысты үзіп алмауға және кеше мен келешектің арақатынасындағы рухани құн­­дылықтарды қайта жаң­ғыр­­туға негізделді. Ұрпақтар сабақ­тастығын ұлықтай отырып, руханиятты дәріптеуге арналған алқалы жиын ұл­тымыздың ұлы кемеңгері Абай Құнанбайұлының рухына тағзым етіп, ескерткішіне гүл шоқтарын қоюмен басталды. Ізгілікке үндейтін игі істің басты ұйымдастырушылары басқосуға Мемлекеттік сый­лықтың лауреаты, қазақтың ай маңдайлы ақын қыздарының бірі – ақын Марфуға Айтхо­жинаны Алматыдан арнайы шақырыпты. Қала қонақтары мен қалың бұқараға арналған фестивальдің жалпы нобайы кесек-кесек бес бөлімнен құ­ралған. Со­­­ның ал­ғашқысы ре­тінде сахна шы­мылдығы поэзия падишасы Фариза Оңғар­сынованың «Өлең­дер жинағы» кітабының ресми тұсаукесерімен ашылды. Көзі тірісінде қаламдас құрбысы ғана болып қоймай, жан сарайын жан-тәнімен түсініскен досы Фариза жайлы естеліктермен бөліскен  Мар­­фуға апай қайсар қазақ қызы­ның тағы бір өлең­дер жи­нағының жарық кө­руімен оқырман қауымды құттықтады. Фестиваль бағдарламасының келесі кезеңі «Абайдың рухы» мен «Алты Алаштың арысы – Әлихан Бөкейхан» деген атау­лармен жалғасын тапты. Мұн­да Қ.Қуанышбаев атындағы академиялық қазақ музыкалық драма театры әртістерінің сахналауымен Абай Құнанбайұлы мен Әлихан Бөкейханның өмірі мен шығармашылығынан теа­трландырылған көріністер қой­ылды. Астана күніне орай арнайы ұйымдастырылған мере­ке­лік шараның келесі бөлімі «Жыр­лайды жүрек» деген атаумен М.Мақатаевтың 85 жылдығына арналған әдеби-музыкалық композициямен өрбіді. Жас ақындар Мұқағали өлеңдерін оқып, әндерін нақышына келтіре орындады. Ал «Әдебиет әлемінің мақтаныштары» айдарымен өт­кен әдеби-ақындық вернисажда шығармалары арқылы гүлденген Қазақстанды, оның жетістіктері мен тарихын жырлаған қалам иелерімен көрермендердің ер­кін сыр-сұхбатына ұласты. Осы­лайша, шағын форматта ақын-жазушылардың оқыр­ман­дармен өткен кездесуіне бел­сенді қатысушылар арнайы естелік, сыйлықтармен мара­пат­­­талды. Сонымен қатар, шара аясында «Нұр Отан» партиясы Астана қалалық филиалы мен Орталықтандырылған кітап­ханалар жүйесі бірлесе ұйым­дастырған «Елдіктің терең тамыры» атты «Әлихан Бөкейхан оқуларының» жеңімпаздары да анықталып, жеңімпаздарға сый-құрметтер көрсетілді. Ал Абай ескерткішінің ал­дын­дағы алаңқайда ұйым­дас­тырылған кітап баспаларының жәрмеңке-көрмесі мерекенің ажарын аша түскендей. Өйткені, «Ұлы Дала, ұлт мұраты, ұр­пақ болашағы, Мәңгілік Ел – Тәуелсіз Қазақстан!» атауымен көркем безендірілген кең көлемді кітап көрмесі төрт бөлімге негізделген болса, оның ерекшелігі сол «Ширек ға­сырлық белестер», «Еңселі елорда, асқақтаған Ас­тана», «Ұлы мақсаттар мекені» және «Қаламы қанатты тұлғалар» айдарымен айшықталған көр­медегі кітаптардың оқырман қауымға үлес­тірілуі еді. Нұрлыбек ДОСЫБАЙ, «Егемен Қазақстан»