...КЕЛІСІМ-ШАРТҚА ОТЫРДЫ
Таяуда «Теңізшевройл» ЖШС кәсіпорын қызметкерлері бірлестігімен және Теңіз мұнай-газ кешені кәсіподағымен жаңа ұжымдық келісім-шартқа отырғандығын жариялады. «Біздің табысымыз кәсіби біліктілігі жоғары қызметкерлер мен мердігер ұйымдардың жұмысына негізделген. Біз әлемдік деңгейдегі жұмыс жағдайын туғызуға және қызметкерлеріміздің мүддесіне сай келетін қомақты әлеуметтік пакет беруге ұмтылудамыз. Ұжымдық келісім-шарт үдерісі ТШО басшылығына қызметкерлердің және компанияның мүдделерін қамтамасыз етуге көмектеседі», – деп атап өтті «Теңізшевройл» ЖШС бас директоры Тим Миллер.
«Біз әлеуметтік пакет аясын кеңейте түскен жаңа келісім-шарт нәтижесіне риза болдық», – дегенді айтты ТШО қызметкерлері бірлестігінің төрағасы Аманжол Алыбаев.
Жолдасбек ШӨПЕҒҰЛ.
Атырау облысы.
* * *
...АКВАПАРКТІҢ ҚҰРЫЛЫСЫ
Жалпы аумағы алты мың шаршы метр жерді алып жатқан су кешені бір мың адамға дейін қызмет көрсете алады. Канаданың заманауи қондырғылары орнатылып, биіктігі – 18,5, ұзындығы 26 метрді құрайтын болады. Халықаралық талаптарға сай тұрғызылатын бассейнді бойлап төрт отбасылық сырғанақ салынады. Олардың ұзындығы – 150 метр. Мұнда спорт залы, фитнес орталығы мен мұз айдыны да орналасады.
Петропавл оранжереясы жанында бой көтеретін кешенді аттракционның құрылыс жұмыстарымен «Леонтьев» ЖШС айналысуда. Аквапаркті тамыз айында пайдалануға беру көзделіп отыр.
Өмір ЕСҚАЛИ.
Солтүстік Қазақстан облысы.
* * *
...КӨШЕГЕ АТАУ БЕРІЛДІ
Адамның еңбегі ешқашан ұмыт қалмайды. Осындай соңына өшпес өнеге қалдырғандар қатарындағы қарасайлық шежіреші Аубай Байғазыұлының есімімен Қаскелең қаласындағы бір көше аталды.
Қарасай ауданына қарасты Әйтей ауылында дүниеге келген Аубай Байғазыұлы Қаскелең қаласында сауатын ашып, Қазақ мемлекеттік ауыл шаруашылығы институтын тәмамдаған соң, түрлі мекемелерде басшылық қызметтер атқарған. Сонымен бірге, шығармашылыққа ден қойып, ел шежіресін жинақтап, қағазға түсіруді де естен шығармаған. Көп жылдар қазақтың тарихын, шығу тегін, шежіресін зерттеп, өмірінің соңына дейін біріздендірумен болған.
Көкшетаудағы Қарасай мен Ағынтай батырлардың жатқан жеріне белгітас орнатқандардың бірі және қос асылымызға алып кесене сомдауға да өзіндік үлесін қосқан жан.
Күмісжан БАЙЖАН.
Алматы облысы.