Бүгін Қазақстан Республикасының Премьер-Министрі Кәрім Мәсімовтің Моңғолияға сапары басталады.
Алдымен елдің Баян-Өлгий аймағына табан тірейтін Үкімет басшысы Президент Нұрсұлтан Назарбаевтың тапсырмасымен жергілікті қандастарға кездесіп, селден зардап шеккен отбасыларға гуманитарлық көмек көрсетуге қатысады деп күтілуде.
Баян-Өлгий қазақтарына Қазақстан тарапынан гуманитарлық көмек берілетіні жайында кеше Премьер-Министр өзінің твиттердегі парақшасында жазған болатын.
Айта кету керек, 10 шілде күні негізінен қазақтар қоныстанған Баян-Өлгий аймағында сел жүріп, 100-ден аса үй қирап, 700-дей адам баспанасыз қалған еді.
Бұдан кейін Үкімет басшысы биыл құрылғанына 20 жыл толған АСЕМ («Азия-Еуропа» форумы) ұйымының 11-ші саммитіне қатысу үшін Ұлан-Батыр қаласына ұшып кетеді.
«Егемен-ақпарат»