Аймақ басшысы павлодарлық 105 отбасына, олардың ішінде 11 ата-анасының қамқорлығынсыз қалған бала бар, жаңа пәтерлердің кілттерін табыс етті.
Облыс орталығындағы жаңа «Сарыарқа» шағын ауданының аумағында орналасқан үйдің аумағы 8,6 мың шаршы метрді құрайды. «2020 жылға дейін өңірлерді дамыту» бағдарламасы бойынша салынған үйдің құрылысына бюджеттен 686 млн. теңге бөлінген еді.
– Қала бойынша баспана кезегінде 15 мың адам тұр. Тұрғын үй қажеттілігін азайту aмақсатында алдағы жылдары облыс орталығында 22 жаңа үй салынады деп жоспарланып отыр. 9 үй осы жылдың аяғына дейін пайдалануға беріледі. Бұл 900 отбасы жаңа пәтерлермен қамтамасыз етіледі деген сөз, – дейді облыс әкімі Болат Бақауов.
Қоныс тойын тойлаушылардың арасында бюджеттік ұйымдармен қатар, жеке кәсіпорындардың жұмысшылары да бар. Жайлы пәтерлерге қоныстанушылардың қуанышында шек жоқ. Болат Бақауов жаңа пәтердің кілтіне ие болған бір отбасына бағалы сыйлық тапсырды.
– Біз бұл күнді асыға күттік, – дейді Наталья Шепилова. – Мен өзім ата-анасыз өстім. Орта және жоғары білім алдым, қазір мамандығым бойынша жұмыс істеймін.
Бүгінгі таңда «Сарыарқа» шағын ауданында жаңа үйлердің құрылысы қарқынды жүріп жатыр. Жыл соңына дейін тағы да төрт жаңа үй пайдалануға беріледі деп күтілуде.
«Егемен-ақпарат»