Қазақстан Президенті жанындағы Орталық коммуникациялар қызметінде Астана қаласы әкімінің орынбасары А.Лукиннің, Астана қаласы ауыл шаруашылығы басқармасының басшысы Ә.Құрманғалиевтің, «Астық Логистик» ЖШС директоры С.Беликовтің, «Сапа Нан» ЖШС директоры В.Савиновтің және «Мир круп» ЖШС директоры М.Саудагеровтің қатысуымен баспасөз мәслихаты өтті.
Баспасөз мәслихатында елорда әкімдігінің ірі ұн, қант және нан жеткізушілермен келісімге қол жеткізгені, соның арқасында қалада жақын күндері ұн мен қанттың, нанның бағасы арзандайтыны айтылды. Атап айтқанда, қант – 6 теңгеге, нан 5 теңгеге арзандамақ.
– Сауда нүктелері үшін ұн қазіргіден 15 пайыз төмен бағамен жеткізіледі, – деді «Астық Логистик» ЖШС директоры С.Беликов.
Бүгінде елорда әкімдігі тарапынан азық-түлік бағасын реттеу мақсатында тиісті шаралар қабылданып жатқанын атап өткен жөн. Осы мақсатта жұмысты жедел үйлестірумен шұғылданатын штаб құрылып, оған жетекшілік жасау қала әкімінің орынбасары А.Лукинге жүктелген.
А.Лукиннің айтуынша, Астана әкімдігі әлеуметтік маңызы бар азық-түлік түрлерінің бағасына күн сайын мониторинг жүргізеді. Сонымен қатар, азық-түлік өндіретін кәсіпорындарға, көкөніс, жеміс-жидек сақтау қоймаларының, жылыжайлардың жұмысына қолдау көрсетілуде.
Арнұр АСҚАРОВ,
«Егемен Қазақстан»