Үкімет басшысы Қарағанды облысына жұмыс сапары аясында өңірдегі металлургия саласының даму әлеуетін бағалады.
Премьер-Министр Кәрім Мәсімовке «Қазақмыс Корпорациясы» ЖШС басқарма төрағасы Бақтияр Қырықпышев компанияның құрылымдық бөлімшелерінің және түсті металлургияның әлемдік нарықтағы және еліміздегі әлеуеті жөнінде баяндады.
Өткен жылы корпорацияның бөлімшелері, соның ішінде Жезқазған мыс қорыту зауыты шамамен 223 мың тонна катодты мыс өндірді, бұл – жоспардағы көрсеткіштен 3 пайызға артық. Әлемдік экономиканың қиындығына, сұраныс пен бағаның төмендігіне қарамастан, кәсіпорын тобы мыс өндірісін 2014-2015 жылдардың көлемімен бірдей деңгейде ұстап тұруға ниетті.
2016 жылдың алғашқы жартыжылдығында корпорация бөлімшелері 111 мың тонна катодты мыс өндірді, бұл өткен жылдың сәйкес кезеңімен салыстырғанда 8 пайызға артық. Қазіргі таңда кәсіпорын ескі технологиялар – пирометаллургияны (электр балқыту) қолдану арқылы мыс өндіреді. Мұнымен қатар, төменгі сұрыпталған гидрометаллургиялық қайта өңдеу шикізаты арқылы катодты мыс алу үшін сынақ жұмыстарын жүргізеді.
Компания Қазақстанда мыс концентратын өндіру бойынша екі гидрометаллургия зауытын салуды жоспарлап отыр.
Өз кезегінде Қарағанды облысының әкімі Н.Әбдібеков Премьер-Министрге Жезқазған өңірін әлеуметтік-экономикалық дамытудың кешенді жоспарын жүзеге асыру жөнінде есеп берді. Оның сөзіне қарағанда, 2020 жылға дейін өндірістік кәсіпорындарды жөндеуден өткізу, инфрақұрылым құрылысы, геологиялық барлау жұмыстары жөнінде 88 іс-шара өткізу көзделіп отыр екен. Қазіргі уақытта 28 іс-шара аяқталып, осы жылы тағы 7 жоба жүзеге асырылады.
Сондай-ақ, жұмыс сапарының аясында Кәрім Мәсімов Жезқазғанда сүт өнімдерін өңдеудің жаңа технологияларымен танысты.
Мамандандырылған азық-түлік өндіретін «BAYAN компаниясы» ЖШС жаңа кешені Индустрияландыру картасы аясында өткен жылдан бастап жұмыс жасай бастады. Қазіргі таңда цех айрықша технология бойынша әзірленетін 48 тонна сүзбе өнімін шығарады. Сондай-ақ, компания дәрумен қосылған сүт және шырын өндірісін жолға қойған.
Серіктестіктің бас директоры А.Ысқақова Үкімет басшысына өнімдердің негізгі бөлігі жергілікті түсті металлургия кәсіпорындарына өткізілетінін, ал қалған көлемі Жезқазған, Сәтбаев қалаларына және Ұлытау ауданының елді мекендеріндегі дүкен сөрелеріне жіберілетінін мәлімдеді. Сондай-ақ, Кәрім Мәсімовке азық-түлік өндірісі бойынша технологиялық желілер жұмысы таныстырылып, кәсіпорында шығарылатын өнімнің түр-түрі көрсетілді.
Қарағанды облысы әкімінің орынбасары Ғ.Жұмасұлтановтың мәліметінше, өткен жылы өңірдің ауыл шаруашылығы кәсіпорындары 162,9 млрд теңгенің өнімін шығарған. Облыста 127,1 мың тонна ет, 403,6 мың тонна сүт, 624,5 млн дана жұмыртқа және 2 мың тоннадан астам жүн өндіріліпті.
Аймақтық Индустрияландыру картасына жалпы құны 25 млрд теңге болатын агроөнеркәсіп кешенінің 10 инвестициялық жобасы кіреді. Жаңа жобаларды іске қосу 925 жұмыс орнын құруға мүмкіндік береді.
Айдар ӨРІСБАЕВ,
«Егемен Қазақстан»
Қарағанды облысы