Тіршілік болған соң әр түрлі жағдай болады. Аяқ астынан ауыртпалық түсіп, абдырап қалатын кездер де кездеседі. Сондайда қол ұшын бере қоятын қызметтердің бірі – құтқарушылар десек қателеспеспіз.
Біз ІІМ Ақтөбе облысы ТЖД жедел құтқару жасағы мемлекеттік мекемесінің басшысы Қасымжан Байсадақовқа жолығып, әңгімелескен едік.
– Сіздің жақында ғана мемлекеттік награда – «Ерен еңбегі үшін» медалімен марапатталғаныңыздан құлағдармыз, құтты болсын! Өзіңіз басқаратын мекеме бір қарағанда қарбаласы көп, абырой әпермейтіндей болып көрінеді. Ұжымдағы табыстың сыры неде?
– Жылы лебізіңізге рахмет, әрине. Мен бұл салаға 2005 жылы келдім. Ол кездегі атауы басқаша, облыстық суда құтқару қызметі деп аталды, азаматтық қорғаныс жүйесіне қарайтын-ды. Мақтанып отыр демеңіз, қызметтің сол кездегі жағдайы адам аярлық еді. Мекеме паркінде қаусаған жалғыз «УАЗ» машинасы, жамап-жасқаулы екі қайық болды. Екі құтқару қызметі стансасы болды, оның өзі пешпен жылытылатын вагондарда орналасты. Ал суға сүңгуірлердің барлығына ортақ бір арнаулы киім болды десек, біреулер сенер, біреулер сенбес. Барлық құтқарушыларға бір ғана рация тиді. Кадрлар тұрақтамады, жақсы мамандар жарытымсыз айлыққа жұмыс істегісі келмеді. Әрине, оларды да түсінуге болады, отбасын асырау керек.
– Бүгінгі жағдайларыңыз қалай?
– Кетеуі кеткен шаруаны жүйеге түсіру оңайға түскен жоқ. Дегенмен, ұжымның күш-жігерін бір арнаға бағыттау арқылы көп істердің басы қайырылды. Ұсақ-түйек шаруаларды былай қойғанда, 2009 жылы Ақтөбе су қоймасындағы №2 құтқару стансасы типтік жобадағы ғимаратқа көшірілді. 2014 жылы орталық құтқару стансасының типтік жобадағы осы заманғы кешені пайдалануға берілді. Қазір мекемеде 28 автокөлік, оның ішінде, боранда да, лайсаң батпақта да тоқтамайтын «Трэкол» машиналары бар. Сүңгуірлерге қажетті құрал-жабдықтармен жарақтандырылған шағын автобус та өз иелігімізде. Әр сүңгуір өзінің жеке жазғы және қысқы арнаулы киіммен қамтамасыз етілген. 32 суда жүзу құралдары, әр түрлі көлемдегі қайықтар бар. Жалпы, құтқару отрядында 70 адам болса, оның 40-ы таза сүңгуірлер болып табылады. Олардың барлығы Алматы мен Минск қалаларындағы курстарда арнайы даярлықтан өткен мамандар. Сондай-ақ, кезекші диспетчерлік қызмет бөлмесінде шағын баспахана, компьютерлер, жеке жеңіл радиостанса жұмыс істейді. Бұл бөлімді тәжірибелі маман Оксана Кичигина басқарады. Біз суға кетудің, төтенше жағдайға тап болудың алдын алу шараларына көп көңіл бөлеміз. Сондықтан, ақпараттық, үгіт-насихаттық материалдарын осында дайындауға мүмкіндік мол.
– Құтқару жұмыстарының нақты нәтижесіне тоқтала кетсеңіз.
– Мекеменің жақсы материалдық-техникалық базасы, қызметке дайындығы жоғары мамандарды іріктеп алуы өз нәтижесін беруде. Алысқа бармай-ақ, өткен жылы отряд құтқарушыларының 519 жедел шақыруларға барғанын, 332 адамды құтқарғанын, оларға медициналық және психологиялық көмек көрсетілгенін айтсақ та жеткілікті болар. Жол-көлік оқиғаларына және тұрмыстық сипаттағы төтенше жағдайларға шақырулар кезінде 226 адам құтқарылды, олардың 102-сі балалар. Бұдан басқа 5 адамның өзіне өзі қол салуының алдын алуға, 62 адамды қауіпсіз жерге шығаруға көмектестік. Өткен қыс өте ауыр болды. Жолда тұрып қалған 300 «Фура» автокөлігінің жүргізушілерін қар тұтқынынан алып шықтық. Ақпан айында Қарғалы ауданында боранда адасқан шопанды ажал аузынан алып қалсақ, Хромтау ауданы, Көктау ауылындағы 7 жасар ауру баланы емханаға жеткіздік. Мұның өзі де бұл бағыттағы атқарылған шаруалардың бір парасы ғана.
Әңгімелескен
Сатыбалды СӘУІРБАЙ,
«Егемен Қазақстан»
Ақтөбе облысы