Ертең еліміздің бірнеше қаласында футболдан Қазақстанның ХХ чемпионаты жалауын көтереді.
Биылғы маусымға «Тобыл», «Ақтөбе», «Қайрат», «Локомотив», «Ертіс», «Шахтер», «Атырау», «Жетісу», «Тараз», «Ордабасы» мен бірінші лигадан келген «Восток» пен «Қайсар» клубтары қатысып, жыл соңына дейін мыңнан тұлпар, жүзден жүйрік шыққан команданы анықтайды. Олар өткен жылғы ереже бойынша әр қайсысы 32 кездесуден өткізіп, чемпионаттың ортасына келгенде үздік өнер көрсеткен командалар 1-6, басқалары 7-12 орын үшін күш сынасады. Сөйтіп, алтылыққа іліккен командалар УЕФА-ның чемпиондар лигасы, Еуропа лигасы сияқты жарыстарының іріктеу сындарына жолдама алса, 11-12 орынды иеленген командалар бірінші лигада алғашқы екі орынды алған командалармен орын алмастыратын болады.
Жалпы, жанкүйерлер арасында биылғы чемпионаттың өткен жылғы маусымға қарағанда қызықты және тартысты өтеді деушілер көп. Өйткені, командалардың бәрі былтырдан бері жылы жақтарда оқу-жаттығу жиындарын өткізіп, тәжірибелі ойыншылар мен шет елдік легионерлермен толығып, жаңа маусымға жақсы дайындықпен келіп отыр. Дегенмен, елшілік жарысқа жақсы дайындықпен келсе де, қай команданың биыл чемпион атанатынын айту қиын. Қазір клубтарға жергілікті бюджет пен демеушілердің көмегімен қыруар қаржы бөлініп, олардың лайықты өнер көрсетулеріне бар жағдай жасалуда. Мәселен, Алматының «Қайрат» командасына әкімдік 700 млн. теңге көлемінде қаржы бөлсе, оның демеушісі «ҚазРосГаз» компаниясының клубқа көрсетіп жатқан көмегі қаншама. Алматылықтар осындай қолдаудың арқасында өткен жылдан бері Қара теңізді жағалап, осы кезге дейін 14 кездесу өткізді. Соның бесеуінде жеңіске жетсе, 6 ойында тең ойнап, 3 кездесуде ұтылды. Солай десек те биылғы маусымда чемпиондық атаққа «Тобыл», «Ақтөбе» мен «Локомотив» командаларының таласу мүмкіндігі көп. Ал «Ертіс» пен «Шахтер» клубтары тағы да алтылықтан орын алуға күш салатыны сөзсіз. Сондай-ақ, «Қайрат», «Жетісу», «Ордабасы» командалары алтылыққа кіруге үмітті. Биылғы маусымның жұмбақ командасы ретінде «Қайсар» мен «Восток» командаларын айтуға болады. Өткен жылы бірінші лигада өнер көрсеткен бұл екі команда қазір құрамын мықтап жасақтап алағаннан кейін Премьер-лигада лайықты бәсекелес болу үшін тас-түйін дайын тұр. Тағы бір атап өтетін нәрсе, осы жылғы чемпионатқа командалар шет ел легионерлерін көптеп шақырып отыр. Мұндай жағдай Қазақстан чемпионаты өткізіле бастаған кезден бері әлі болған емес. Тіпті, легионерлердің өзі Оңтүстік Америка, Испания, Африканың бірнеше елдерінен келуде. Мысалы, «Ақтөбеде» Тринидад және Тобагодан келген Роберт Праймус, испаниялық Хуан Хосе Безарес, камерундық Мак Мбоне Алан Элвис Боно, сенегалдық Малик Мане, Тити Эссомба ойнаса, «Ордабасыда» бразилиялық Вагнер Кошта Перейро, угандалық Эндри Мвесинге өнер көрсетеді. Ал басқа командаларға келген легионерлердің көбі ТМД және Еуропа елдерінен жиналған футболшылар. Олардың ішінде «Жетісуде» өзбекстандық Ұлықбек Бақаев, сербиялық Милош Михайлов, Иван Цветкович, словениялық Дарко Кременович, литвалық Арунас Климавичус, «Қайратта» серб Марко Джорджевич, беларус Павел Кирильчук, болгариялық Деян Христов, ресейлік Сергей Струков пен Владимир Байрамов ойнаса, «Шахтердың» қатарына босниялық Алдин Джидич, Никола Василевич, беларус Андрей Порываев, литвалық Гидиминас Вичюс, серб Миланко Рашкович қосылып отыр. Сонымен бірге шымкенттік командаға украиналық Артем Касьянов пен серб Иван Перич келсе, қазіргі чемпион Қостанайдың «Тобыл» клубына екі босниялық азамат Самир Бекрич пен Александр Салучиш өнер көрсетуге ниет білдірген екен.
2 наурыз күні Қазақстан чемпионаты басталар алдында Астанада «Локомотив» пен «Тобыл» командаларының ел супер кубогын сарапқа салғанын білеміз. Осы кездесуде 2:1 есебімен қарсыластарды жеңген астаналық аяқдопшылар Қазақстанның супер кубогына ие болды. Айтайын дегеніміз, өткен маусымда қостанайлық команда сапында чемпион атанған Нұрбол Жұмасқалиев «Локомотивке» ауысқанымен, «Тобыл» құрамында оның орнын жоқтатпайтын бірнеше жас қандастарымыздың бар екенін және олардың жасыл алаңда қарсыластарымен иық теңестіріп бәсекелесе алатынын байқадық. Биылғы біріншілікке қатысатын барлық 12 команданың ішінде осындай футболшылар баршылық. Дегенмен, Қазақстан чемпионатына жылдағыдай 12 команда емес, кемінде 14 клуб қатысатын болса, ұлттық құрамаға іріктелетін қаракөз ойыншыларымыздың саны бұдан да көбейетін еді дегіміз келеді.
Дастан КЕНЖАЛИН.
Суретте: «Локомотив» (Астана) – суперкубок иегері.