Қазақ күресінен болатын "Еуразия барысы" халықаралық турнирінің жалпы жүлде қоры 20 млн. теңгені құрайды. Бұл туралы Орталық коммуникациялар қызметінде өткен брифинг барысында белгілі болды.
«Жалпы жүлде қоры 20 млн. теңгені құрайды. Бірінші орын алған балуанға 10 миллион, екінші орынға 6 миллион, үшінші орынға 4 миллион теңге беріледі", - деді Қазақ күресі федерациясының вице-президенті Сәрсен Құранбек
Турнир 1 желтоқсан күні төртінші рет өткізіледі. Оған Грузия, Моңғолия, Польша, Ресей, Тәжікстан, Өзбекстан, Қазақстан қатысады. Ал "Қазақстан Барысы" қазақ күресін дамыту қорының төрағасы Арман Шураевтың айтуынша, жарысты тікелей эфирде тек қазақстандық қана емес, ресейлік және түрік телеарналары көрсететін болады.