Қазақстан Президенті Нұрсұлтан Назарбаев БҰҰ Бас хатшысы Пан Ги Мунмен телефон арқылы сөйлесті. Әңгіме барысында Мемлекет басшысы БҰҰ Бас хатшысымен халықаралық өзекті мәселелерді, оның ішінде Мағриб елдеріндегі, Таяу Шығыс пен Орталық Азиядағы жағдайды талқылады, деп хабарлады Қазақстан Республикасы Президентінің баспасөз қызметі.
Пан Ги Мун Қазақстанның белсенді және сындарлы сыртқы саяси қызметі үшін ризашылығын білдірді. Атап айтқанда, БҰҰ Бас хатшысы Қазақстанның ЕҚЫҰ-ға табысты төрағалығын және осы ұйымның саммитін Астанада жоғары деңгейде өткізгенін атап көрсетті.
Пан Ги Мун Қазақстан Президентінің Қасым-Жомарт Тоқаевты БҰҰ жүйесіндегі басшылық қызметке ұсыну туралы ұсынысы БҰҰ тарапынан мұқият қаралғанын хабарлады. Қазақстанның халықаралық қауіпсіздікті, ядролық қаруды таратпау режімін нығайтуға қосқан айтулы үлесін, елдің әлеуметтік-экономикалық дамудағы және сыртқы саясаттағы табыстарын ескере отырып, БҰҰ Бас хатшысы Қасым-Жомарт Тоқаевты БҰҰ-ның Женевадағы бөлімінің Бас директоры қызметіне тағайындау туралы шешім қабылданғанын айтты.
Өз кезегінде, Нұрсұлтан Назарбаев Пан Ги Мунның 2010 жылы Қазақстанға жасаған екі сапарының маңыздылығын атап өтіп, БҰҰ Бас хатшысына 29 тамызды Ядролық сынақтарға қарсы іс-қимылдың халықаралық күні деп жариялау туралы Қазақстанның бастамасына қолдау көрсеткені үшін ризашылығын білдірді.
Нұрсұлтан Назарбаев Пан Ги Мунды Семей сынақ полигонының жабылғанының 20 жылдығына арналатын халықаралық конференцияға қатысуға шақырды. БҰҰ Бас хатшысы бұл шақыру үшін алғыс айтып, ұсынысты зейін салып қарауға уәде етті.