Сақтық шаралары пысықталды

Биыл қар жақсы түсті. Ресми деректерге сүйенсек, өзенд­ер­де­гі мұздың  қалыңдығы 40 сантиметр шамасында. Оның үстіне, синоптиктердің хабарына қара­ғанда, наурыз айының екінші онкүн­ді­гінде күн 10 градусқа дейін жылы­нуы мүмкін. Бол­жамға сенсек, қардың күрт еритін түрі бар.  Ақтөбе қаласының әкімі Архимед Мұхамбетовтің төрағалы­ғы­мен өткен су тас­қынының алдын алу ша­ра­ларына байла­ныс­ты мәжілісте  көктемгі су тас­қынына дайын­дық мәселелері  тағы бір рет пысықталды. Қазір қала көшелерін қардан тазалау жұмыстары жалғасуда.  Әлі де 70 көшені тазалау жос­пар­ланып отыр.  Қыс бастал­ға­лы  40 мың тонна қар шығарыл­ған.  Көктемгі су тасқыны кезіндегі шаруаларға  50 су соратын техника, 3 экскаватор, 70 құм таситын  көлік, 8 бульдозер, әр­қай­сысының сыйымдылығы 20 текше метр 4 жылжымалы сорғы стансасы  және басқа да көлік құралдары мен 3 мың текше метр құм дайындалған. Су тасқы­ны­ның алдын алу шараларына 22 миллион теңгеден астам қаржы бөлініпті. Қала маңындағы   негізгі үш су қоймасының көктемгі қар суын қабылдау жәйі де тия­нақ­тал­ды. «Ақтөбесушаруашылығы» мекемесінің директоры Бекзат Нә­метовтің мәлімдеуінше, ең үл­кен  Қарғалы су қоймасында қазіргі күні 42 миллион текше метр су бар. Оның жалпы сый­ым­дылығы – 280 миллион текше метр. Сондықтан әлі де 240 миллион  текше метр суды қабылдай алады. Ал Ақтөбе су қоймасы 145 миллион текше метр суды қабылдаса, Сазды су қой­масына  5 миллион текше метр су кетеді. «Ақтөбе судан құтқару қыз­меті» мекемесінің бастығы Қа­сымжан Байсадақов судан құт­қару  бригадаларының көк­тем­гі су тасқыны жұмыс­тарына сақа­дай-сай дайын­дығын мә­лімдеді. Төтенше жағдайлар туындаған  жағ­дайда құтқару қайықтары, жанар-жағар май, дәрі-дәрмек­тер, басқа да қа­жетті заттар жеткілікті. Көктемгі су тасқынының алдын алу іс-шараларын жүр­гі­зу үшін құрылған арнайы ко­мис­сияның құрамы бекітілді. Жұмыс жоспары жасалып, 8 же­дел топ жасақталды. Жедел топтар өздеріне бекітілген ай­мақ­тарда  тәулік бойына кезекшілік ұйымдастырып,   еріген қар суының қауіпті жағдайын қадағалайтын болады. Қазақта «Сақтансаң сақ­тар­­мын» деген сөз бар. Өткен жылғы Шығыс Қазақстан және Алматы облыстарын­дағы су тасқыны кезіндегі оқи­ғалар тілсіз жаудан әр­қашан сақтанудың ащы са­бақтары болды. Сон­дықтан да қала басшыларының көктемгі су тасқынынан еш­кім­нің зардап шекпеуін осы бастан ойластыруы құптарлық іс. Сатыбалды СӘУІРБАЙ. Ақтөбе облысы.