Мәжіліс депутаттары С.Өтебаев, С.Қаныбек, Қ.Ержан, Б.Мәкен және М.Бопазов Маңғыстауда алдымен Құрық паром кешені құрылысының жағдайымен танысты.
Желтоқсанда порттың бірінші көтеру-өткізу көпірі өндірістік сынақтан өтіп, вагондардың кемеге тиелу жолы тексерілді. Осы айдың соңына таман оларды іске қосу жоспары орындалса, бұл – порт су көліктерін қабылдай бастайды деген сөз. Мұнан соң портта екінші көтеру-өткізу көпірі мен жүк көліктері жүретін бөліктің құрылысы қолға алынады. Елдегі ең ірі көліктік-логистикалық инфрақұрылым жобасымен танысқан депутаттар кешен құрылысын уақытында абыроймен аяқтауды тапсырды.
Мәжіліс депутаттары Ақтау – Жетібай тасжолы құрылысымен танысып, «Нұр Отан» партиясы Ақтау қалалық филиалы ғимаратында қоғамдық кеңес мүшелерімен, қалалық мәслихат депутаттарымен жүздесті. Сондай-ақ, Кәсіпкерлер палатасында шағын және орта бизнес өкілдерін қабылдап, сауалдарына жауап берді. Назарбаев зияткерлік мектебінде ұжыммен кездесті.
Маңғыстаулықтарды тыңдаған депутаттар күрмеуі қиын мәселенің жоқтығын, әйтсе де өздерін толғандырған қандай да бір сұрақтармен арнайы сайт арқылы хабарласуға болатындығын, өздерінің мүмкіндігінше мәселені шешуге атсалысуға әзір екендіктерін жеткізді.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы