Астанада Ауған соғысы ардагерлері ұйымдарының «Қазақстан ардагерлері» қауымдастығы Мемлекет басшысы Нұрсұлтан Назарбаевтың билік тармақтары арасында өкілеттіктерді қайта бөлу жөніндегі Үндеуін талқылау және елімізде қолға алынғалы отырған конституциялық реформаларға қатысты ұсыныстар әзірлеу бойынша дөңгелек үстел өткізді.
Аталған қауымдастық төрағасы, Парламент Мәжілісінің депутаты Бақытбек Смағұл басқосу барысында бірінші кезекте Мемлекет басшысының Үндеуі, соған қатысты ұсыныстар бүкіл еліміз бойынша қызу талқыланып жатқанына тоқталды.
– Бұл – мемлекеттіліктің дамуының жаңа кезеңін, яғни халықтың мемлекеттiк билiктiң бiрден-бiр бастауы ретіндегі өзінің конституциялық мәртебесін жүзеге асыра бастағандығын айқындайды. Бұл, сондай-ақ, біздің азаматтық қоғамның кемелдігін де білдіреді, – деді Ауған соғысы ардагерлері ұйымдарының «Қазақстан ардагерлері» қауымдастығының төрағасы.
Одан әрі Б.Смағұл конституциялық реформа ел тәуелсіздігінің мызғымастығын бекіткелі отырғанын, өйткені, тәуелсіздік – ұлтымыздың тарихындағы басты жетістігі, халқымыздың басты қазынасы екенін айта келіп, еліміздің жаһандық бітімгерлік және қауіпсіздік саласындағы миссиясын Ата Заңымызда растап, оны нақты нормаларда бекіту қажеттігін, Конституциямызда Қазақстанның жаппай қырып-жою қаруларын қолданудан бас тартатыны нақты көрсетілуі керектігін ұсынды.
Қауымдастық төрағасының орынбасары Сәкен Махамбетов өз кезегінде жүргізіліп жатқан реформаның мәні – билік өкілеттіктерін байыпты қайта бөлу, тұтастай алғанда, саяси жүйені демократияландыру болып табылатынын, сондай-ақ, парламентаризм негіздерін нақты нығайтудың бірегей мүмкіндігі екенін атап өтті.
Соңында дөңгелек үстелге қатысушылар арнайы қарар қабылдады. Қарарда: «Ауған соғысы ардагерлері ұйымдарының «Қазақстан ардагерлері» қауымдастығы ұйымдастырған дөңгелек үстелге қатысушылар, Мемлекет басшысының 2017 жылғы 25 қаңтардағы Үндеуінде жариялаған конституциялық реформаны өткізуді тұжырымдамалық түрде қолдайды және оны парламентаризмнің, мемлекеттік басқарудың және азаматтық қоғам институттарының негіздерін нақты нығайтудың бірегей мүмкіндігі деп санайды. Президент, Парламент және Үкімет арасында өкілеттіктерді қайта бөлу бойынша ұсыныстарды қазақстандық мемлекеттілікті және Қазақстанның саяси жүйесін демократияландыруды дамытудың жаңа кезеңі ретінде қарастырады», – деп жазылған. Сондай-ақ, олар конституциялық реформаға қатысты өздері әзірлеген бірқатар ұсыныстарын Президент Әкімшілігіне, Парламентке және Үкіметке жолдайтын болды.
Жолдыбай БАЗАР, «Егемен Қазақстан»