Кеше елордада Қазақстан халқы Ассамблеясының Достық үйлері мен өңірлердегі «Қоғамдық келісім» кеңестерінің директорларына арналған республикалық кеңес өтті.
Кеңес барысында Елбасының Қазақстан халқына арнаған Жолдауы кеңінен талқыланды, сондай-ақ ЭКСПО-2017 халықаралық көрмесіне атсалысуға дайындық жұмыстары қарастырылды. Бұған қоса, жер-жердегі мекемелердің басшылары өз өңірлерінде атқарылып жатқан жұмыстардың жай-күйі туралы баяндады.
Жиында сөз алған Қазақстан халқы Ассамблеясы хатшылығының сектор меңгерушісі Азат Жолдыбаев Елбасы Жолдауын және билік тармақтары арасында өкілеттіктерді қайта бөлу мәселелері жөніндегі Үндеуін халыққа түсіндіруде Достық үйлері мен «Қоғамдық келісім» кеңестеріне үлкен міндет жүктелетініне тоқталды.
– Біз осы айдан бастап наурыздың 5-не дейін Алматыдағы Достық үйінің базасында республикалық 18 шара өткізуді жоспарлап отырмыз. Оның 14-ін тікелей этномәдени бірлестіктер жүргізеді. Бір шара ғылыми-сарапшылық топтардың қатысуымен, әдістемелік бағытта өтеді. Жалпы, жұмыс форматы дөңгелек үстел, семинар түрінде болуға тиіс. Дәл осындай жұмыстар еліміздің барлық өңірінде жүргізілуі керек, – деді Азат Жолдыбаев.
Оның айтуынша, шаралардың міндетті түрде республикалық ауқымда болуы шарт емес. Олардың қай-қайсысы да маңызды. Себебі, Қазақстан халқы Ассамблеясының ресурстарын тиімді пайдаланып, Жолдаудың, конституциялық реформаның мәнін әрбір азаматқа жеткізу керек, ең маңыздысы осы.
Өңірлердегі Достық үйлері жергілікті халықтың аяғы үзілмейтін, тіршілік қыз-қыз қайнап жатқан мекеме болуы керек. «Қоғамдық келісім» республикалық мемлекеттік мекемесі төрағасының орынбасары Талғат Жақиянов осындай ой айтты.
– Жақында Оңтүстік Қазақстан облысында еліміздегі ең үлкен Достық үйі құрылғалы жатыр. Осындай Достық үйлері барлық облыстарда бар. Өкінішке қарай, өңірлерді аралап жүргенімізде кейбір Достық үйлерінің қаңырап бос тұрғанын көреміз. Негізі, ол мекемелерде түрлі шаралар үздіксіз өтіп жатуы тиіс. Достық үйінде кіріп-шығып жатқан адамдар, түрлі ұйымдарға келген жастар, мәдени шараларды тамашалауға келген жандар көп болуы керек. Біз бүгін елордаға жиналған қауыммен бірлесіп, осыған қатысты ұсыныстарды қарастырғанымыз жөн, – деді Талғат Жақиянов.
Кеңеске қатысушылар Мемлекет басшысының Қазақстан халқына арнаған Жолдауының, ұсынылған конституциялық реформаның қаншалықты зор маңызға ие екенін халыққа түсіндіру жолдарын ұйымдастыру туралы өзара ой бөлісті. Бұдан бөлек, ЭКСПО-2017 халықаралық көрмесіне атсалысуға әзірлік барысы да сөз болды. Сонымен қатар, жиында Достық үйлерін дамытудың 2017-2020 жылдарға арналған тұжырымдамасын іске асыру бойынша іс-шаралар жоспары ортаға салынды.
Арнұр АСҚАР, «Егемен Қазақстан»
Суретті түсірген Ерлан ОМАРОВ,
«Егемен Қазақстан»