Дерек бойынша, өткен жылғы экономикалық өсімге құрылыс секторы – 2,6 пайыз, көлік және логистика саласы – 3,8 пайыз және ауылшаруашылық саласы 5,5 пайыз үлес қосқан. Сондай-ақ, инвестициялық белсенділік те оң ықпал етіпті. Негізгі капиталға салынған инвестиция көлемі 5,1 пайызға өсіп, 7,7 трлн теңгені құраған. Бағаны тұрақтандыруға қатысты қабылданған шаралар нәтижесінде жылдық инфляция 8,5 пайыз шамасында сақталған. Бұл туралы Ұлттық экономика министрлігінің қорытынды есебінде айтылды.
Мамандар пікірінше, былтыр экономиканың ішкі және сыртқы жағдайларға бейімделуі қиын болған көрінеді. Энергия ресурстарының бағасы құбылмалы және тұтынушылық белсенділіктің төмендеуіне қарамастан, дағдарысқа қарсы шаралар мен «Нұрлы жол» мемлекеттік бағдарламасы 2016 жылы 1 пайыз ІЖӨ өсімін қамтамасыз еткен.
Ұлттық экономика министрі Тимур Сүлейменов ағымдағы жылы ішкі және сыртқы жағдайлардың біртіндеп оңалуына байланысты экономиканың кейбір салаларына қатысты көрсеткіштерді қайта қарау жоспарланып отырғанын айтады. «Негізгі басым бағыттар – мұнай өндірісін Қашаған арқылы 79,5-тен 81 млн тоннаға дейін ұлғайту; өнеркәсіпте қайта өңдеу саласын ИИДМБ жобалары және «Нұлы жол» бағдарламасын жалғастыру арқылы қайта өңдеуді 1,2 пайыздан 2,6 пайызға ұлғайту; «Нұрлы жол» мемлекеттік бағдарламасы арқылы елдің транзиттік әлеуетінің 4 пайызға өсуін қамтамасыз ету маңызды», деді ол. Аталған факторлар экономиканың даму қарқынын арттырады және биылғы ІЖӨ өсімін 2 пайыздан кем түсірмек емес.
Биыл экономикада оң өзгерістер, жұмыспен қамту арқылы елдегі әлеуметтік тұрақтылықты қамтамасыз ету, халықтың табыс табуына жағдай жасау, экономикалық өсімді ынталандыру жұмыстары жалғасады. «Бизнестің шығындарын қысқарту, оның ішінде энергетика, көлік, логистика және ТҮКШ бойынша кешенді жұмыс атқару жоспарланған. Сондай-ақ, бәсекелестікке кедергі келтіретін заңнама толық тексеріліп, олқылықтар анықталды», деп атап көрсетті Т.Сүлейменов.
Асхат РАЙҚҰЛ,
«Егемен Қазақстан»