Қазақстан делегациясы БҰҰ Қауіпсіздік Кеңесінің Сириядағы гуманитарлық ахуалға арналған кезекті отырысына қатысты. Онда БҰҰ Бас хатшысының орынбасары Стивен О’Брайеннің гуманитарлық мәселеге байланысты хабарламасы тыңдалды.
Стивен О’Брайен өз сөзінде сириялықтардың көпшілігінің, әсіресе, әйелдер, балалар мен басқа да осал топтардың мүшкіл халі, сондай-ақ елдегі дәрі-дәрмек тапшылығы туралы Қауіпсіздік Кеңесін хабардар етті.
Мәжіліске қатысушылар Сирия дағдарысын бейбіт жолмен шешуден өзге амал жоқ екенін жеткізді. Сондай-ақ, жиында Қауіпсіздік Кеңесінің мүшелері Сириядағы соғыс қимылдарын тоқтату ісін ілгерілетуде белсенді рөл атқарған Қазақстанның күш-жігерін атап көрсетті.
Қазақстан делегациясы БҰҰ-ның Сириядағы гуманитарлық мәселелерді үйлестіру жөніндегі басқармасына қарасты гуманитарлық және медицина қызметкерлерінің қауіп-қатерге толы жағдайлардағы жұмысын жоғары бағалады. Бұған қоса, Қазақстан өкілдері Сирия мәселесін шешудің жалғыз тәсілі ретінде келіссөздер жалғастырылу қажет екенін сөз етті. Сонымен қатар, отырыста Сириядағы жанжалды бейбіт реттеу жолдарын іздестіру бойынша Астана процесі БҰҰ қамқорлығындағы Женева платформасын сапалы түрде толықтыратындығы айтылды.
Қазақстан жағы жанжалдасушы тараптарды қарапайым халықты адам төзгісіз азаптаудан, қалаларды қоршауға алу тактикасын пайдаланудан толығымен әрі тез бас тартуға шақырды. Сондай-ақ, қазақстандық делегация әлемдік қоғамдастыққа гуманитарлық көмекпен аз қамтылған Сирия қалаларына қажетті жәрдемді қауіпсіз және кедергісіз жеткізу үшін БҰҰ гуманитарлық агенттіктерімен ықпалдасу қажеттігін ескертті.
Қазақстандық дипломаттар ИЛИМ (Қазақстанда тыйым салынған) тобының Әл-Ракка мен Эл-Баб қалаларындағы су көздері, әлеуметтік инфрақұрылым, көпірлер, жолдар мен ауруханаларды жоюын айыптады. Осы ретте, адамдардың азапталуына байланысты лаңкестік топтарға қарсы қатаң шаралар қабылдау қажеттігіне назар аударылды.
Дайындаған
Жолдыбай БАЗАР,
«Егемен Қазақстан»