Биыл Қазақстан Ұлттық Олимпиада комитетінің құрылғанына ширек ғасыр толып отыр. Аталған ұйым 1992 жылы ірге көтеріп, сол жылы Қазақстан Халықаралық Олимпиада комитетіне мүше болып қабылданды. Ал 1994 жылы Лиллехамерде (Норвегия) өткен қысқы Олимпиадаға Қазақстан тұңғыш рет тәуелсіз мемлекет ретінде қатысқан болатын.
Таяуда ХХ ғасырдың ең жүйрік қазағы, қысқа қашықтыққа жүгіруден КСРО-ның бірнеше дүркін чемпионы және рекордшысы, Еуропа чемпионатының жүлдегері болған Әмин Тұяқов Қазақстан Ұлттық Олимпиада комитетін 25 жылдық мерейтойымен құттықтады.
Сексеннің сеңгіріне шыққан ардагер спортшы Қазақстан құрама командасының Рио-2016 Олимпиадасындағы жетістігін Ұлттық Олимпиада комитеті жүргізген ауқымды жұмыстардың нәтижесімен тығыз байланыстырады.
«Тимур Құлыбаевтың Ұлттық Олимпиада комитетін басқарып отырғанына аз ғана мерзім болғанымен, ол спорт саласымен бірталай уақыттан бері біте қайнасып келеді. Тәжірибесі мол. Бұған дейін Қазақстан Республикасының Бокс федерациясын басқарып тұрған кезінде ел боксшылары Азия ойындарында жоғары нәтиже көрсетті. Былғары қолғап шеберлерінің Алматыдағы әлем чемпионатын жоғары деңгейде өткізді. Рио Олимпиадасында спортшыларға қолдау көрсетіп, жарыстың басы-қасында жүрді», дейді әйгілі атлет.
Әмин Тұяқов спортты дамыту ісінде Ұлттық Олимпиада комитеті рөлінің зор екенін айтады. Сол себепті де, ол ұйымға жаңадан келген жас мамандардың ел спортының дамуына сүбелі үлес қосатынына сенімді.
«Рио-де-Жанейро Олимпиадасында жеңіп алған 17 медаль – тарихи жеңіс. Енді алдағы Олимпия ойындарында медаль санын арттыру, алтын жүлдені көбірек алу үшін жан-жақты жұмыстар жүргізіледі деп сенемін. Ол үшін спортшыларды қолдауды бұрынғыдан да арттыра түсу керек. Ұлттық Олимпиада комитетінің жұмысы жеңіл емес. Сондықтан, бұл жаңа команданың алдында үлкен асқаралы міндеттер мен биік асулар тұр», дейді ол.
Сонымен қатар ардагер спортшы Қазақстанда жеңіл атлетика спортын дамытуға байланысты өзінің ой-пікірімен де бөлісті.
«Ұлттық Олимпиада комитеті жүлдесі көп жеңіл атлетика спортын елімізде дамыта түссе деймін. Ольга Рыпакова сияқты әр жарыстан медаль алып келетін үш-төрт жеңіл атлетіміз болса, Олимпиададағы жүлделеріміздің саны арта түсер еді. Қазір Қазақстанда тек Өскеменде ғана жабық манеж бар. Шымкентте және Алматыда ғана стандартқа сай келетін стадион бар. Сондықтан басқа аймақтарда да жеңіл атлетика залдары мен манеждер саны көбейсе деймін», деп ой түйіндеді Ә.Тұяқов.
Қайрат ӘБІЛДИНОВ,
«Егемен Қазақстан»