Қардан тазарту акциясы басталды

Биыл қар қалың түсті. Ал оны аршып алу қиынға соғып тұр. Әсіресе, жасы егде тартқан адам үшін бұл да бір жұмыс. Осыған орай, Ақмола облысында «Жастар – Отанға» жобасы аясында қардан тазарту отрядтары құрылып, тұрғындарға аулаларын тазартуға қолұшын беруде. Әсіресе, «Жас Отан» ЖҚ-ның Ақкөл аумақтық бөлімшесі белсенділік танытып, «Көмек қолыңды бер» акциясының бас­талуына мұрындық болып отыр. Мысалы, «Жас Отан» жа­с­тар қанатының бөлім­­шесінен ауда­н орта­лығының тұрғындары Ба­қыт­­жан Ауса­лықова, Ев­докия Трофи­мова және Любовь Елисеева келіп, көмек сұраған. Осыған орай, «Жас Отанның» белсенділері болып табылатын №4 Ақкөл орта мектебінің оқушылары қарт адамдарға аулаларын қар­дан аршып беруге қолұшын беруге кірісті. Еріктілер Ұлы Отан со­ғысы ардагер­лерінің аулаларын, балабақ­шаларды, жол­дар мен шатыр­ларды да қардан тазартты. Олар үшін бұл қызықты көрінгенмен, қарт адамдар үшін бұл үлкен көмек. Осылайша, жас­тар үл­кендердің риза­шы­лығына бөленіп, өздерінің қол­қанат болу­ға жарап қалған­дарын сезі­нуде. Асқар ТҰРАПБАЙҰЛЫ, «Егемен Қазақстан» Ақмола облысы