Қаржы министрлігінің кедендік бақылау комитеті үстіміздегі жылғы қаңтар-наурыздағы кеден органдарының қызметі туралы ақпарат берді. Кедендік бақылау комитетінің ресми өкілі Е.Байтанаевтың келтірген мәліметтері бойынша кеден органдары 2011 жылғы 1 қаңтардан 31 наурызға дейін бюджетке 262 млрд. 781 млн. теңге түсіріп, болжамды тапсырма 126,2 пайызға орындалыпты. Бұл өткен жылмен салыстырғанда 138 млрд. 106 млн. теңгеге артық көрінеді. Сонда Қазақстанның әрбір кеденшісі көрсетілген мерзім ішінде бюджетке 183 млн. 300 мың теңге түсуін қамтамасыз еткен. Сөйтіп республикалық бюджетке кедендік төлемдердің түсу үлесі 37,5 пайызды құрап отыр дейді ресми өкіл. Бұған қоса кедендік тексеруді жүргізу нәтижесі бойынша 6 052 млрд. теңге қоса есептелген, бұл ретте іс жүзінде 3 448 млрд. теңге өндіріліп алынған.
Жалпы осы кезеңде 131 қылмыстық және 2 888 әкімшілік іс қозғалған. Есірткі контрабандасы бойынша 25, оның ішінде қызметтік-іздестіру иттерін пайдалана отырып 16 дерек анықталған. Тәркіленген есірткілердің салмағы 21,607 кг. құрап, оның ішінде героин 12,696 кг. Мәселен, «Достық» кедені ЖШС директорына қатысты жалпы құны 150 570 АҚШ доллар тұратын 6 вагон мыс рудасының контрабандалық фактісі бойынша ҚК 209-бабы 2-бөлігінің «г» тармағы бойынша қылмыстық іс қозғалды. Ал Жамбыл облысы бойынша КБД қызметкерлері «Меркі» БӨП «Бішкек-Луговой» бағытындағы жолаушылар пойызында Қырғыз Республикасының азаматынан салмағы 5 кг. 920 грамм героин тәркіледі. Ұйымдастырушылық, қылмыстың алдын алу және басқа да жүргізілген шаралар нәтижесінде кеден қызметкерлерінің құқық бұзушылық және өзге де қылмыстар жасауы азайды. Бұл орайда бірінші тоқсанда кеден органдары лауазымды тұлғаларына қатысты 17 қылмыстық іс қозғалды. Оның ішінде басқа құқық қорғау органдарымен өзара іс-қимылда 14 іс қозғалды. Осы кезең ішінде кеден органдары қызметкерлері жасаған 13 сыбайлас жемқорлық құқық бұзушылық анықталды. Сөйтіп, өткен жылмен салыстырғанда кеден органдары жүйесінде сыбайлас жемқорлық 50 пайызға, сыбайлас жемқорлық құқық бұзушылықтың 70 пайызға төмендеуі байқалды.
Кеден одағы сыртқы шекарасының қазақстандық учаскесіндегі өткізу пункттерінде бақылауды күшейту мақсатында Кедендік бақылау комитеті оңтүстік шекараны кедендік бақылаудың осы заманғы техникалық құралдарымен жарақтандыруды одан әрі жүргізуде. Мәселен, 2010 жылы кедендік бақылаудың инспекциялық тексеріп қарау кешені, көлік құралдарын есепке алудың автоматтандырылған жүйесі, тауарлардың жеткізілуін бақылаудың автоматтандырылған жүйесінің жолақтары, багаждар мен қол жүктерін сканерлеуге арналған рентгентелевизиялық аппараттар, дербес қол тигізбей тексеріп қарау жүйесі және радиациялық бақылаудың 6 автоматтандырылған жүйесі техникалық құралдарын орнату аяқталды. Үстіміздегі жылы да кедендік бақылауды осы заманғы техникалық құралдармен жарақтандыру жоспарланып отыр.
Александр ТАСБОЛАТОВ.