Халық тілегі қабыл болды

Халық ел президенттігінен үміткерлер арасынан Нұрсұлтан Назарбаевты таңдап алатынына бәріміз бір кісідей сенген едік. Бұл тарапта иненің жасуындай күмән-күдігіміз болмағандығына ар-ожданымыз куә. Барлық ой-ниетіміз, пейіліміз Мемлекет басшысының мерейінің артуына ауды да тұрды. «Ұйғыр авази» газетінің бетінде күн сайын халықтың осынау ықыласы айнадағыдай жарқырап көрінді десек, қате айтпаспыз. Сайлау күнгі құбыланама халық көкірегіндегі қасиетті таңдауды қателестірмеді. Үмітіміз алдамады, жиырма жыл бойы жүріп келе жатқан темірқазық нысанамыздан адастырмады. Солай болды да. Бұл – халықтық таңдау, халық ешқашан да қателеспейді, оған ешқандай да күмән жоқ дейтініміз де сондықтан ғой. Еліміздегі ілгерілеу мен саяси тұрақтылықтың, де­мо­кратиялық дамудың жар­қын үлгісін көрсеткен тәу­ел­сіз Қазақстан халық­ара­лық игі істердің бастама­шысы болып келе жатқаны да белгілі. Мұның өзі еліміздегі бірлік пен ынты­мақ­тың, достық пен тату­лық­тың арқасы екендігі айдан анық. Біздің осындай бірегей бірлігіміздің, дәйекті тұ­рақтылығымыздың негізгі дем берушісі Нұрсұлтан Әбіш­ұлы екенін біз, қа­зақстандық ұйғырлар, өте жақсы білеміз. Соның ай­қын айғағындай, 3 сәуір күні өткен президенттік сай­лауда Қазақстандағы ұй­ғыр диаспорасы 100 пайыз Нұрсұлтан Назарбаевты қол­дап дауыс берді деп нық сеніммен айта аламын. Өйт­кені, халқымыздың қалт­қысыз сеніміне ие болған Елбасының жеңісі бірлігіміз бен өзара түсіністігіміздің жемісі екендігін бәріміз күнбе-күн сезінудеміз. Жа­ңа­ғы сөзімізге дәлел қажет болса, Қазақстан ұйғыр­ла­ры­ның басым көпшілігі Алматы облысының Ұйғыр, Панфилов, Еңбекшіқазақ, Талғар аудандарында және Алматы қаласында тұрады. Егер Алматы облысында сайлаушылардың 96,9 пайы­зы, Алматы қаласында 68,5 пайызы сайлауға қатыс­қа­нын ескерсек, олардың ара­сында ұйғырлар аз пайызды құраса да, 100 пайыз дауыс­тарын Елбасына бергеніне күмәнім жоқ. Бұл ұйғырлар жиынтық тұратын елді мекендердегі жігітбастарының мәліметтері (жігітбасы — ұйғырларға тән жергілікті өзін-өзі басқару институты сияқты ұлттық дәстүр). Осы мәліметтерге қарап отырып өзімнің туған халқымның кемел Көшбасшы, әлемдік деңгейдегі асқақ саясаткер, өз Елбасымызға тағы да дауыс беріп, риясыз сенгендігіне елжірей қуандым. Иә, халықтың тілегі қа­был болды. Туысқан да қан­дас қазақ халқының ғасыр­лар бойы армандаған тәуел­сіздігінің іргетасын қалаған Нұрсұлтан Назарбаев қазақ бауырларымды да, барлық қазақстандықтарды да жар­қын болашаққа қарай нық сеніммен алға бастап келеді. Арқаның төрінде әдемі Астана қаласын тұрғызған Елбасы дүние жүзіне Қа­зақстанның демократиялық ел екенін танытып, елімізді әлемдік деңгейге көтерді. Сондықтан да халқымыз өз Президенті Н.­Ә.На­зар­баев­қа деген шынайы сенімі мен сөзсіз қолдауын тағы бір рет дәлелдегенін көріп отыр­мыз. Қателеспеген халық таңдауы шынайы бүкіл­халықтық мерекеге айналып жатқандығы да нақ сон­дықтан деп білемін. Юлдаш АЗАМАТОВ, «Уйғур авази» газетінің бас редакторы, Қазақстан халқы Ассамблеясының мүшесі.