Кеше Премьер-Министр Кәрім Мәсімов Қостанайға келді. Ол облыстың активін Елбасының Жарлығымен Қостанай облысының әкімі болып аймақтың бұрынғы басшысы Сергей Кулагиннің қайта тағайындалғанынан хабардар етті.
Сергей Кулагин Қостанай облысын жеті жыл басқарды. Республикадағы облыс әкімдерінің арасында бір облыс тізгінін осынша ұзақ мерзімге ұстаған басшы да өзі екен.
Сергей Витальевич облыс әкімі лауазымына қайта тағайындалуын Елбасының өзіне деген үлкен сенімі деп бағалады және сол сенім биігінен табылу үшін тапсырған тапсырмаларды жүзеге асыруға бар күш-жігерін жұмсайтынын айтты.
Кәрім Мәсімов Сергей Кулагинді құттықтай отырып, алда көңіл бөлетін мәселелер мен тапсырмаларды да атап өтті. Көктемгі дала жұмыстарын өткізу әкімнің алда атқаратын басты жұмысының бірі болмақ. Биыл мал шаруашылығын дамытуға арналған бағдарлама басталмақ. Үкімет басшысы облыс әкімінің осы мәселеге көңіл бөлуін және азық-түлік бағасын қадағалауды тапсырды.
Нәзира ЖӘРІМБЕТОВА.
Қостанай.