Қазақстан Республикасының Премьер-Министрі Кәрім Мәсімов сейсенбі күні кешкілік Өскеменге келіп, Шығыс Қазақстан облысының актив жиынын өткізді. Жиынды ашқан Үкімет басшысы Бердібек Сапарбаевтың облыс әкімі қызметіне қайтадан тағайындалғаны туралы Елбасы Жарлығын оқып берді.
Облыстық ардагерлер кеңесінің төрағасы Г.Бердюгин, «Имстальком» кәсіпорнының басшысы, облыстық мәслихаттың депутаты М.Лабуков Бердібек Мәшбекұлының екі жыл ішінде атқарған істеріне жоғары баға берді. «Жаңа ғана депутаттар корпусы облыс әкімінің кандидатурасына бірауыздан қолдау білдірді. Өңірде үдемелі индустриялық-инновациялық жобалар батыл өндіріске енгізілуде, тек өткен жылы өңірде 15000-нан астам жұмыс орны ашылды», деді олар.
Үкімет басшысы К.Мәсімов Б.Сапарбаевты құттықтап, Семейдегі жылу беру қазандықтарын жөндеуді жалғастыру, денсаулық сақтау, білім беру салаларына серпін қосу, шағын және орта кәсіпкерлікті дамыту, адамдардың әл-ауқатын жақсартуда көп ізденістер таныту қажеттігін атап көрсетті. Үдемелі жобаларды одан әрі жалғастыра беру керектігі де сөз болды.
Оңдасын ЕЛУБАЙ.
Өскемен.