Таяуда Қазақстанның Берлиндегі елшілігінің ұйымдастыруымен, Президент Н.Ә.Назарбаевтың билік тармақтары өкілеттіктерін қайта бөлу жөніндегі Үндеуі мен 31 қаңтардағы «Қазақстанның Үшінші жаңғыруы: жаһандық бәсекеге қабілеттілік» атты Жолдауының негізгі ережелерін түсіндіру мақсатында баспасөз мәслихаты өтті.
Қоғамдық-саяси ортаның өкілдері, дипломаттар, саясаткерлер, сарапшылар және Германияның БАҚ өкілдері қатысқан басқосуда еліміздің ГФР-дағы елшісі Болат Нүсіпов кіріспе сөз сөйлеп, Қазақстанның 25 жыл ішінде экономикасы дамыған, тұрақты саяси жүйесі қалыптасқан елге айналғанын айта келіп, бұл қол жеткізілген табыстар мемлекетке саяси жүйені реформалауға мүмкіндік беретінін атап өтті. Қазақстандық дипломаттың сөзіне қарағанда, конституциялық реформаны енгізу жолымен билік өкілеттігін қайта бөлу Қазақстанның демократиялық тұрғыда дамуын жылдамдатады.
Бұдан кейін елші Мемлекет басшысының биылғы Жолдауының негізгі ережелеріне тоқталды. Б.Нүсіповтің айтуынша, Жолдауда көрсетілген басымдықтар Қазақстанды 30 озық елдің қатарына қосылу жолындағы іс-әрекеттеріне серпін береді, ел экономикасының одан әрі дамуына оңтайлы әсер етеді, сондай-ақ бұған дейін қабылданған стратегиялық бағдарламалардың орнықты жүзеге асырылуына жол ашады.
Баспасөз мәслихаты барысында қатысушылар Қазақстан Президенті Нұрсұлтан Назарбаевтың билік тармақтары арасындағы өкілеттілікті қайта бөлу жөніндегі Үндеуі елдегі демократиялық процесті нығайтудағы маңызды қадам болып табылатынын, оның ел экономикасының дамуын, халықтың әл-ауқатының өсуін қамтамасыз ететінін, аталған бастамалар дер кезінде күн тәртібіне шығарылғанын сөз етті.
Баспасөз мәслихатының соңында Қазақстан елшісі Қазақстан мен Германияның екіжақты қарым-қатынасының өзекті аспектілеріне байланысты неміс аудиториясын қызықтыратын сұрақтарға жауап берді. Сонымен бірге, германиялықтарды Қазақстанның БҰҰ Қауіпсіздік Кеңесінің тұрақты емес мүшесі ретіндегі қызметінің басымдықтарымен және Астанада өтетін ЭКСПО-2017 халықаралық көрмесін ұйымдастыру алдындағы жұмыстардың барысымен таныстырды.