Қазақ тілінің мәртебесі өседі
«Қазақ тілі мен қазақ әдебиетіне қатысты барлық дүние әрқашан маңызды. Бұл туралы Білім және ғылым министрлігі жан-жақты мәлімет берді. Олар керісінше емтихан тапсыру кезіндегі қазақ тілінің рөлін күшейтті. Қазіргі кезде министрлік ҰБТ-ны екіге бөлді: мектеп бітіру емтиханы және жоғары оқу орнына түсу емтиханы. Бітіру емтиханында қазақ тілі қалдырылды және ол аттестатқа әсер етеді. Университетке оқуға түсушілерге қарағанда мектеп бітірушілер айтарлықтай көп. Яғни, бұл қазақ тілінің мәртебесі одан әрі өсе түседі дегенді білдіреді», деді министр. Д.Абаев аптаның ақпараттық ағынының арасынан алматылық Вячеслав Поповтың мәлімдемесіне ерекше тоқталды. Ол өзінің Facebook-тегі парақшасында жарты жыл ішінде қазақ тілін үйренуге құлшыныс танытып отырғанын жазған болатын. «Мен Вячеслав Поповтың қазақ тілін үйренемін деген декларациясын өзіме түртіп алдым. Мұны қадағалайтын боламын. Ақпарат және коммуникациялар министрі ретінде мені де қазақ тілінің оқылмай, белсенді түрде талқыланатыны, ал азаматтардың қызығушылығы елеусіз қала беретіні таңдандырады», деді ведомство басшысы.
Ұшу қауіпсіздігі ұдайы назарда
«Азаматтарымыздың азаматтық авиациядағы қауіпсіздікке назар аударуы түсінікті. Қазір қызметтік тергеу жүріп жатыр. Оның нәтижесі бойынша ақпарат құралдарында жеткілікті мәлімет беріледі. Қазірдің өзінде бізге ұшқыштар экипажы нұсқаулықты қатаң сақтағаны және әуе жолаушылары үшін қатерді барынша төмендеткені белгілі», деді Д.Абаев. Ведомство басшысы үш ұшақ та әр түрге жататындықтан, мәселе істен шығу жүйесіне байланысты емес екенін айтты. «Мемлекет халықаралық әуе желілерінің де, ішкі әуе желілерінің де қауіпсіздігін қалт етпей қадағалайды. Азаматтық авиацияның ұшу қауіпсіздігіне арналған тұтас бағдарлама бар. Үкімет пен Азаматтық авиация комитеті ХААҰ-мен (Халықаралық азаматтық авиация ұйымы) тығыз жұмыс істейді. Аталған ұйыммен қол қойған барлық қажетті нұсқаулықтарды Қазақстан орындайды», деп сендірді министр.
Қызмет көрсету орталықтары көбейеді
«Біз арнайы ХҚО-ларда 700 мыңға жуық жүргізуші куәлігін беріп, 3,5 миллионға жуық мемлекеттік қызмет көрсеттік. Барлығын автоматтандырдық. Арнайы ХҚО-лар салдық. Әрине, мұндай арнайы ХҚО-лар бар өңірде жұмыс істей бермейтіні өкінішті. Бұл мекемелер 12 қалада бар. Қазір осы үдерісті әрі қарай жалғастырудамыз. Ағымдағы жылдың ішінде тағы екі ХҚО-ны іске қосамыз деп ойлаймын», деді министр. Д.Абаев «ерекше» нөмірлерге қатысты да ойымен бөлісті. «Бүгінде мемлекет қазынасына осындай «әдемі» нөмірлерді сатудан 5,3 миллиард теңге түсті», деді ол.
Министр сондай-ақ, жаңа «Ел Арна» телеарнасын іске қосу туралы да айтты. «27 наурызда біз «Ел Арнаны» іске қосамыз. Бұл арнада қазақстандық көркем және деректі фильмдер үздіксіз көрсетілетін болады. Тек қазақстандық кинолар. Бұл біздің телеарналардың тарату желісінен орын таба алмай жүрген отандық фильмдерді экранға шығаруға мүмкіндік сыйлайды», деді министр.
Әзірлеген Думан АНАШ, «Егемен Қазақстан»