Бүгінде байыпты істерді қолға алып, қарқынды даму жолына түскен Жаңатас қаласында су тапшы. Қала тұрғындары ауызсу зәрулігін сезінуде. Бұлай дейтініміз, қаладағы көп қабатты үйлерге су таңертеңгі сағат 7 мен 12-нің аралығында және кешкі 18 бен 23 аралығында ғана беріледі. Ал адам үшін судың қажеттілігі тәуліктің қай мезгілінде болса да туындайтыны даусыз. Тұрғындар болса таңертең үйден шығарда бос ыдыстарға, тіпті, ваннаға су толтырып кететіндерін айтады. Шынында да, олай етпеске амалы тағы жоқ. Ал ауданның даму көрсеткіштері мен қол жеткізген табыстары баяндалған аудан әкімінің есебінде бұл мәселені Жаңатас қаласындағы «Айгөлек» балабақшасының тәрбиешісі Ольга Касапкина көтеріпті. Әрине, бұл жалғыз ғана адамның емес, бүкіл жаңатастықтардың тілегі әрі жергілікті билікке сауалы. «Судың да сұрауы бар» екенін білген халық суды тіршілік көзіне балаған. Ал қала адамдарына ол тіпті ауадай қажет.
Аудан әкімінің орынбасары Берген Омарбек бұл мәселе жуық арада шешімін табатындығын айтады. Себебі, осыдан алты жыл бұрын тұрғындардың сұранысын қанағаттандыру мақсатында нақты жоба да қолға алыныпты. Жобаның сметалық құны 2 миллиард 227 миллион теңгені құрайды екен. Дегенмен, «Су құбырларын жаңғырту» бағдарламасының екі кезеңі бойынша бұл мақсатқа 2011 жылы 500 миллион, 2012 жылы 859 миллион, ал 2015 жылы 442 миллион 424 мың теңге қаражат бөлініп, игерілген. Өткен жылы 352 миллион 370 мың теңге қарастырылған. Енді республикалық, облыстық бюджеттен бөлінген бұл сомаларға жұмыс атқарылып жатқанын айтқан Б.Омарбек аудандағы таулы аймақтар Көпбұлақ пен Бүркіттіден 84 шақырым су құбырларының тартылып отырғанын мәлімдеді. Айта кетейік, бұл жұмыс 2011 жылы басталған.
Ал тұрғындар үшін бұл мәселенің бәрі алты жылдан бері бауын тапса да, байлауын таппаған дүние болып көрініп тұр. Бәрінен де олар үйлеріне тәуліктің барлық мезгілінде су келіп тұрғанын қалайды.
Кезінде күллі елге өндірісімен аты шыққан Жаңатас қаласы бүгінде су мәселесінен таршылық көріп отыр дегенге сену қиын. Бірақ бәрібір ақиқатты айналып өтуге болмайды. Енді талай жылдан бері «жыр» болып келе жатқан су мәселесін аудан әкімінің орынбасары ағымдағы жылдың бірінші жартыжылдығында шешіледі деп отыр. Сонымен қатар, тұрғындарға тәулігіне су сегіз сағаттан берілген күннің өзінде халық қаладағы «Жаңатас-Су-Жылу» мекемесіне 3 миллион 200 мың теңге қарыз екен. «Егер суды тәулігіне берсек, халық оны төлей алмайды», дейді Б.Омарбек.
Бірінші жартыжылдықтың бітуіне де екі айдан сәл ғана астам уақыт қалды. Қалың қардың көбесі сөгіліп, көктем мінезін танытқан шаққа да куә болдық. Бұл уақытта тіршіліктің оянып, түрлене түсетіні ақиқат. Енді Жаңатас жақтан да жағымды хабар болып қалатын күн алыс емес сияқты. Келгеніне көп бола қоймаса да көптің көкейінде жақсы пікір қалдырып үлгерген аудан әкімі Балабек Нарбаев су мәселесін жолға қояды деген сенім бар.
Хамит ЕСАМАН,
«Егемен Қазақстан»
Жамбыл облысы