Р.Василенко бірінші кезекте 2015 жылдың 27 тамызында Астанада Қазақстан мен Атом энергетикасы жөніндегі халықаралық агенттігі (МАГАТЭ) арасында Төмен байытылған уран банкін құру туралы келісімге қол қойылғанын атап өтті. Оның айтуынша, Қазақстан бұл келісімді өткен жылы ратификациялаған. Қазіргі таңда банк ғимаратының құрылысы жүргізілуде. Ол биыл пайдалануға беріледі деп күтілуде.
Сондай-ақ, Сыртқы істер министрінің орынбасары банктің ашылу салтанатының 29 тамызға белгіленуінің себебін де түсіндіре кетті. «Төмен байытылған уран банкін ресми түрде 29 тамызда ашудың өзіндік маңызды себебі бар. Нақтылай айтқанда, 1949 жылдың 29 тамызында Семей сынақ полигонында Кеңес Одағы алғаш рет ядролық қаруын сынаған, сондай-ақ, 1991 жылдың 29 тамызында Қазақстан Президенті Нұрсұлтан Назарбаевтың тарихи Жарлығымен аталған полигон жабылған. Бұл күн БҰҰ тарапынан Қазақстан Президентінің бастамасы негізінде Ядролық сынақтарға қарсы халықаралық іс-қимыл күні деп жарияланды», – деді ол.
Сонымен қатар, Р.Василенко аталған банктің ашылу рәсіміне Қазақстан Президенті Нұрсұлтан Назарбаев пен Атом энергетикасы жөніндегі халықаралық агенттіктің бас директоры Юкия Аманоның қатысатынына үміттенетінін жеткізді.
Өз кезегінде Юкия Амано аталған іске байланысы барлық үдерістер кестеге сай жүріп жатқанын, банк ресми түрде ашылғаннан кейін агенттік одан төмен байытылған уран отынын сатып ала бастайтынын айтты.